Shillong, Jymmang 08
Ka Meghalaya ka la khur kawei ka takma rnong ha ka Khelo India Youth Games 2025 kaba dang ïaid shaphrang ha Bihar.
Kane ka la wan lyngba u rangïalehkai siat khnam u Devraj Mohapatra ha ka Recurve hadien ba u la jop ïa u Vishu na Uttar Pradesh da 7-3 point ha ka sngi Balang ha Bhagalpur, Bihar.
Haba phai sha ka kynhun ïalehkai phutbol kaba la rah ïa ka nam lahduh mynshem snem, ka la mad noh ïa ka jingshah rem ha ka Odisha da 2-1 kol ha ka sngi Palei. Na ka Meghalaya la thep da u Donboklang Kharjana ha ka minit kaba 70.
Lah ban pynkynmaw ba ha ka 6 tarik mynta u bnai kane ka kynhun hapoh ka jingïalam u Bah Jeffrey Warlarpih (coach) ka la jop haduh 10-1 kol ïa ka Chandigarh. Te kumta kane ka kynhun ka donkam ban jop ha ka jingïakhun ba khatduh pyrshah ïa ka West Bengal ha ka 10 tarik, namar ar tylli ki kynhun ki ban wan ha ka kyrdan ba hakhlieh na baroh ar tylli ki group kin ïoh rung sha ka quarter final.
Lah ban pynkynmaw ba ha kane ka lympung kaba la long ha Bihar, ka Jylla ka la phah ïashim bynta haduh shiphew tylli ki jait jingïalehkai kiba kynthup ïa ka Football kaba la ïoh rung lyngba ka direct entry, katba kiwei pat kiba la ïoh da ka wild card entry ki long ka Archery, Athletics, Badminton, Boxing, Cycling, Gymnastics, Judo, Shooting bad ka Swimming.
