Shillong, Jymmang 08
U Superintendent of Police (SP) ka East Khasi Hills, Bah Vivek Syiem u la buh ka jingkyntu sha baroh ki trai bad nongñiah kali ba kin kiar na kaba pynkheiñ ïa ki aiñ ñiah kali khnang ba kan long ka jingshngaiñ ïa ki paidbah nongleit jingleit.
U SP u la ong ba ka la don ka jingkiew ha ka jingdon jong ki kali, ki ar shaka bad saw shaka kiba pyndait tiar ha ki ktang mih tdem, kiba pynmih ïa ki jingsawa kiba jam ha nongbah khamtam ha ki por mynstep bad mynmiet kaba la ktah ïa ki nongleit nongwan khamtam kito kiba la noh rta, ki khunlung khynnah.
Shuh shuh na ka liang jong u SP u la ong, “Watla na ka liang ki pulit man ka por ki ju kyrpad bad kyntu ïa ki trai jong ki kali hynrei dang ïohi ba ki kali ki pyndonkam ïa ki Non-Standard Number Plate, ki ïit ïong ba long beaiñ, ki Film, ki blinkers/Flash Light kiba pynkheiñ ïa ki kyndon ïaid kali.”
Kumta ha kaba ïadei bad kane, na ka liang jong u SP u la kyntu ïa ki nongñiah kali ba kin kiar na ki jingpynkheiñ ïa ki kyndon kiba la buh bad ban pynthikna ïa ka jingshngaiñ ha surok bad kumjuh ruh ïa ki nongleit nongwan.
Ha kawei pat ka liang, u SP u la maham ruh ba kino kino kiba pynkheiñ kin ngat ha ka jingpynshitom katkum ka kyndon jong ka aiñ.
