Aizawl, Jymmang:
Ki pulit ka Mizoram ha Champhai distrik, ki la ïoh ban kurup palat 236 kilo ki dawai Methamphetamine Tablet, kiba la antad ba ka dor jong ki ka long T.30.72 klur, ha ka jingkhynra kaba la pynlong ha kine ki arsngi ba la leit.
Ka kynhun pulit ka Dungtlang Police Station ka la bat ïa kawei ka kali Bolero kaba suba jur (registration MZO1G-7112) kaba ïaid sha ka liang jong ka Bungzung.
Hadien ba la pynlong ïa ka jingkhynra ryngkat bad ki sakhi ba laitluid kiba la don lang, ki la lap ïa 8 tylli ki byrni nylon kiba don 199 tylli ki kynja dawai kynbat. Ka jingkhia baroh jong ki dawai kuli ba la ïoh kurup ka long 236.33 kilo, ha ryngkat ka pisa kaba T.2,89,500 bad ka kali kaba la pyndonkam ban kit.
Ki pulit ki la ïoh ban kem ïa arngut ki nongshong shnong na Champhai Vengthar ha katei ka jaka, ïa kiba la tip kyrteng kum u Laltanpuia uba 30 snem ka rta bad u Vanropuia uba 27 snem ka rta bad baroh arngut ki dei ki khun jong u Lalchamreia. La buh jingujor hapoh ka mukotduma (kaba don ïa u number 17/25) katkum ki kyndon 22(c)/25/29 jong ka aiñ Narcotic Drugs and Psychotropic Substances Act.
Ha ka jingbuddien, la phah ïa ki kynhun pulit sha Kolasib ban kem ïa kiba ap ïa ki mar ba la ñiew beaiñ.
Kane ka la pynlong ban ïohkem sa lai ngut ki briew harud jong ka shnong Zanlawn, Kolasib, kine ki kynthup ïa u Nirupan Nath (27) na Kadamtala, Tripura, u Lukman Uddin (33) na Churaibari, North Tripura; bad u Sagardey (27) na Choraibari, North Tripura.
Ka jingtohkit ka dang ïaid shakhmat hapoh ka jingpeit jong u Shivendu Bhushan, IPS, Superintendent of Police, Champhai, katba ki bor pynïaid ki dang trei ban pynduh pyndam noh ïa ka network khaïi drok kaba kham heh.
