Shillong, Jymmang 08
Ka Meghalaya Pradesh Congress Committee (MPCC) kaba don tang uwei u MLA bad shong ha ka Liang Pyrshah ha ka Jylla, ka la pynbna ïa ka rai ba kan ym treh ban ïadon bynta ha ka All Party Committee (APC) ba la thung da ka Sorkar Jylla ka ban ïasyllok ïa ki kam ba ïadei bad ka jingtyrwa pynïasoh lynti rel hapoh ka Jylla.
Haba batai ïa ka daw halor katei ka rai ban ym don bynta ha ka APC, u Secretary ka MPCC, Bah Manuel Badwar u la ong ba ka Sorkar ka khlem thaw ïa ka All Party Committee na ka bynta kiba bun ki kam ba kongsan ba ïadei ha ka Jylla, hynrei ka la shu rai marwei, bad bynrap ba mynta ka thaw ïa ka committee ka mut aïu.
U Bah Badwar u la ong ba ka rai jong ka Sorkar ban thaw ïa ka komiti ka dei tang ka kamkai ban pyni ba ki la pynïadon bynta lang ïa baroh, hynrei ka jingshisha hi ka long ba ki kwah ban tynrong ïa ki jingkynnoh ha kiwei ruh haba ïadei bad ki kam kaba kim lah ban shim rai dalade.
“Ka jingïohi jong ka Congress ka shai bha. Ka khlem thaw komiti ha kaba ïadei bad kiba bun ki kam ba kongsan ka Jylla, ki shim rai hi dalade. Balei? Namar ki don ïa ka jingbun paid, bad ka dei ka rai jong ki paidbah ban ailad ïa ka Sorkar MDA ba kan shim rai hi dalade. Mynta haba ki sahkut ne dambit ha ka jaka ba kim lah ban khih sha kadiang kamon ne hapdeng, ki pyrshang ban tan lang ïa baroh shajuh bad kynnoh lang ïa baroh,” la ong u Nongïalam ka Congress haba kren ha ka sngi Palei.
U la ong ba ka Congress kam kwah ban ïashim bynta ha kaei kaba ki (Sorkar) kim sngewlah ban leh dalade, bad kane ka pyni ïa ka jingtlot jong ka Sorkar.
U Bah Badwar u la ong ba kane ka jingthaw jong ka Sorkar ïa ka APC ka dei beit tang ka jingkwah ban pyni sha ki paidbah ba ka la kynthup bad pyndon bynta lang ïa baroh.
“Lada kwah ban pynïadon bynta lang ïa baroh ha kata, te pynïadon bynta lang ïa baroh ha baroh ki kam, ym ban shu pynïadon bynta tang ha kawei ka mat kaba phi la sahkut kaba ym lah ban pdiang,” la ong biang u Nongïalam ka Congress.
Lah ban pynkynmaw ba shwa ïa ka seng Congress, ka Voice of the People Party (VPP) ka la kyntait ban don bynta ha ka APC bishar pynïasoh lynti rel, halor ka nongrim ba donkam ban don shwa ïa ki lad jingïada na ka jingwan tyllep ki briew ba nabar.
