Shillong, Jymmang 08
U Rangbah Shnong Umkiang kaba hap ha East Jaiñtia Hills Dis-trict, u Bah Lasting Pala u la ong ba lada khie ka thma India bad Pakistan, lada ka Bangladesh ka ai jingkyrshan ïa ka Pakis-tan ki paidbah kiba sah ha khappud ki don jingma.
Haba ïakren bad u nonglum khubor, u Bah Lasting u la ong ba lada ka Bangladesh ka kyrshan ïa ka India kiba sah ha khappud kim don jingma.
U la ïathuh ba ki shipai BSF ha kine ki sngi ki la wan ïakynduh ban pyntip ba kan don ka korphiw ha ka por mynmiet khnang ban ïada ïa ka jingrung jingmih ki briew na Bangladesh sha India haba dang don ka jingïakynad hapdeng ka India bad Pakistan.
U la pynpaw ka jingsngewkmen ba lada pyrkhing kumne ha khappud ka biang bha namar ki nong Bangladesh kiba wan tuh kim ju nud shuh ban wan kiew sha Umkiang.
U Bah Lasting u la pyntip ba ki nongtuh na Bangladesh ki shna jingkieng da u siej ban jam sha shiliang u sainar shiah.
Shuh shuh u la ïathuh ba ki BSF ki kham jynjar ban peitngor ha khappud namar shane sha Meghalaya ki bun ki jaka ba long lum bad long riat tang hapoh 10 metre kim ïohi shuh ym kum ha rithor namar jaka ba madan da jngai katno-katno dang lah ban ïohi.
“Lada don kiba napoh shnong ne nabar shnong kiba leit sha khappud hajan ki sainar shiah ha ka por mynmiet khlem ka jingpyntip, ngim don jingkitkhlieh namar ngi la dep pynbna ba la dep ai korphiw,” u la ong.
U la ïathuh ba ki don ki shnong ha Bangladesh kiba bha hynrei ka don kawei ka shnong Mikirpara kaba bun bha ki nongtuh kaba la pynjah burom lang ïa kiwei ki shnong kiba marjan.
U la pyntip ruh ba naduh ba ka Sorkar jong ka Sheik Hasina ka la khyllem, ki BSF ki la sdang ban pyrkhing ïa ka rung ka mih ha khappud namar ka jingïadei jong ka ri Bangladesh kam don shuh bad ka India hynrei mynshwa haba ka India bad Bangladesh ka dang ïajan ki BSF kim da pyrkhing than ha khappud.
