Shillong, Jymmang 08
Ka Labang Nangphyllut Pangam Raliang Area Committee (LNPRAC) ka la pynkhreh ban leit tied ïa ka jingkhang jong ka Supreme Court lada ïa ka Labang Nangphyllut kaba hap mynta ha Block-I ym pynphai sha Meghalaya ha ka jingïakren pynbeit pud ha ka kylla ba-ar hapdeng ki ar Jylla.
Ka kynhun jong ki nongïalam ka Labang Nangphyllut Pangam Raliang Area Committee, ha ka sngi Palei ki la ïakynduh ïa u Myntri Rangbah ka Jylla ban pynkynmaw ïa ka jingdonkam jong ka Block-I ban wanphai sha Meghalaya.
Haba kren bad ki lad pathai khubor, u Adviser bad Nongaiktien ka LNPRAC, Paiem Laborious Manik Syiem u la ong ba kane ka kam ka dei kaba ki la ïakren bad u Myntri Rangbah phra bnai mynshwa, ha kaba u la ong ba kam dei eh ka jingïakren halor ka Block-I, hynrei ka LNPRAC ka don ïa ki sakhi satar ba ka Labang Nangphyllut ka dei ka bynta jong ka Ri u Laiphew Syiem u Khatar Dolloi, bad la ïakren halor ka nongrim ba la shah dkhat jubor kawei ka Dolloiship.
U la ong balei mih tang Khatwei Dolloi, namar ba ka Labang Nangphyllut Dolloiship kaba don 36 tylli ki shnong la dkhat jubor ïa ka ha u snem 1951 da jingleh ka Sorkar Assam, bad kane ka jingleh ka dei jingbat bor ïa ka synshar paidbah, namar ym lah ba ïa kawei ka kur ban pynïasnoh bad kawei pat ka kur.
“Ngi la ngam bin-pa-bin da kaba lum baroh ki sakhi satar bad ka jingthmu jong ngi naduh nyngkong ka long ban ai ïa ki sakhi kiba biang sha ka Sorkar ba kan khlaiñ ban ïakhun na ka bynta jong ngi. Hynrei, lada ka pulom ha ka jingïakren ngi ngin ym sngap jar bad nga ngeit skhem ba ki sakhi satar ba ngi don, lada ngi leit sha ki bor ka aiñ nga thikna ba ngin jop bad ka Labang Nangphyllut kan wanphai biang sha ka Ri ki Laiphew Syiem Khatar Dolloi,” la ong u Pa’iem Laborious.
Na ka liang u Pa’iem Laborious u la ïathuh ba u Myntri Rangbah, Conrad K Sangma u la shim ïa kane ka kam kum kaba kongsan tam ha ka jingpynbeit pud ha ka kylla ba-ar bad ka Assam, wat la kam dei kaba suk namar kane ka kam ka dei kaba la 75 snem.
