Shillong, Jymmang 08
Ka top um kaba la shna naduh ka por ba synshar ki phareng ha u snem 1936 la lah ban pynbit pynbiang da ki pipe bathymmai ba kan bteng ban pynpoi um sha ki nongshong shnong ka Laban bad Madan Laban.
Kane ka top um kaba la palat 80 snem ka don ha ka shnong Madan Laban, bad hadien ba la dep pynbha bad pynïaid ïa ki pipe um ba thymmai, ha ka sngi Balang la pyllait ïa ka um da u MLA ka South Shillong konstitwensi, Bah Sanbor Shullai ha ka jingïakynduh kaba lyngkot ha ka jaka ba don katei ka top um.
Kane ka top um ka la pynpoi um ïa ki paidbah ka shnong Laban bad Madan Laban, bad ka jingpynbha ïa ki pipe sam um na katei ka top ka la sdang naduh u snem 2019-20.
Katkum ka jingpyntip u Bah Sanbor ka jinglut na ka bynta ban pynbha ïa kane ka top um ka long T.7.74 klur, kaba la kheiñ kyllum lang na ka skhim jong ka Sorkar Pdeng bad Sorkar Jylla, bad tang na ka bynta ban pyndait ïa ki pipe ba thymmai ka jinglut ka la kot palat T.6 klur.
Ha katei ka jaka nalor katei ka top ba la rim, la don ruh ka top maw ba la shna da ka dewbilat ban pynlang um bad sam pat sha ki nongshong shnong.
Na ka liang u Superintendent of Water Works ka Municipal, Bah Gordon Lyngdoh u la ïathuh ba ha kitei artylli ki top, ka um ba lah ban pynlang ka long haduh 525 lak liter, ha kaba u la pyntip ba ha ka top rim ba la shna da ka kynja nar lah ban pynlang haduh 231 lak liter bad ha ka top maw lah ban pynlang haduh 294 lak liter ka um.
U Bah Lyngdoh u la ong ba baroh shikatta katei ka top ka ai beit ka jingshakri bad kam don jingthut lane jingpei, hynrei namar ba ki pipe ki la bun ba pei namar ba ki la rim naduh u snem 1936, la hap ban bujli noh ïa ki bad la leh ïa kane ka jingbujli ïa ki pipe lyngba ka skhim Atal Mission for Rejuvenation and Urban Transformation (AMRUT).
