Shillong, Jymmang 08
Hadien ka jingsdang pur ka jingïakynad hapdeng ka India bad Pakistan, ka Sorkar Jylla ka la shim ïa ki sienjam ban pynthikna ba ki mar bam kin ym duna lada jia ba jur ka thma, wat la na ka liang ka Sorkar Pdeng kam pat shym la ai kano-kano ka jingbthah.
Na ka liang u Myntri ka tnat Food & Civil Supplies ka Jylla, Bah Comingone Ymbon ha ka sngi Palei u la ïasyllok bad ki heh ophisar ka Jylla ha ka jingïalang bishar kam ban pynthikna ba ki mar bam kim dei ban duna lada mih kano-kano ka jingjia bad kam dei ban ktah ïa ki paidbah.
Haba kren hadien ka jingïalang, u Bah Ymbon u la pyntip ba kumba ka long mynta kam don jingeh eiei, namar ki mar bam ki biang lut ban pyndap ïa ki paidbah ka Jylla.
U la ong ba ka Sorkar India haduh mynta kam pat pynmih ïa kano-kano ka jingbthah, hynrei ka Sorkar Jylla ka kwah ban pynkhreh lypa ban pynthikna ba ki nongshong shnong kin ym shah ktah.
“Ngi la pynkhreh na ka bynta kane ka kam, wat la ka Sorkar India kam pat ai kano-kano ka jingbthah ïa ngi, khnang ba ki paidbah jong ngi kin ym shah ktah,” la ong u Bah Ymbon.
U la ong ba baroh ki Deputy Commissioner bad ki Sub Divisional Officer ki la pyntip ba kam don satia kano-kano ka jingduna bad ki mar bam ki dang pahuh.
“Ngi la bishar bniah bha ha kaba ïadei bad ka jingdon jong ki mar bam, bad haduh mynta ki mar bam ki biang bad nga kyrpad ïa ki paidbah ba kim dei ban sngew syier ne khuslai ïoh duh bam,” u la ong.
Haba kylli, u Myntri u la pyntip ba ka jingdonkam khaw ha ka Jylla la ïoh na ka Sorkar India kumba 12000 metric ton na ka bynta ban pyndap bam ïa ki nongshong shnong.
Haba kyntu ïa ki nongshong shnong ka Jylla ba kim dei ban khuslai ne syier ha kaba ïadei bad ki mar bam, u Myntri u la ong, “Teng-teng ki briew jong ngi ki shait ngeit biej, bad tang shu don kano-kano ki la leit ïew leit hat ban ïeng laiñ thied tiar thied tar. Nga kyrpad na ka liang jong nga ba ym donkam ban syier ne khuslai.”
U Bah Ymbon u la pyntip ruh ba ka Sorkar ka la buh ïa u nombar ban ïarap 24 kynta, bad haba don ne ïakynduh kano-kano ka jingeh pyntip ha u nombar 1967.
Haba kylli halor ka jingpynkiew dor pathar ki mahajon bad nongkhaïi haba don kano-kano ka jingjia, u Myntri u la ong ba ki trai dukan lane ki mahajon ba die mar bam kim dei ban shim kabu da kaba die rem lada long kumno-kumno ruh, ha kaba u la pyntip ba ka Sorkar ka don ïa ka Price Monitoring and Vigilance Committee, kaba ju khmih bad peit man la ka sngi ba ki mar bam kim dei ban kiew dor bad ki nongdie mar bam kim dei ban shim kabu.
