Nongstoiñ, Jymmang 08
Ha ka taïew ba la dep, ka NeIPS ka la pynlong ïa ka jingsam syrnod bad ïakynduh lang bad ki khynnah samla kiba la trei bad seng kam lajong.
Ïa katei ka jingïalang la pynlong ha ka shlem treikam jong ka NeIPS ha IB, New Nongstoiñ, West Khasi Hills District ha kaba ha kane ka sngi ka Kong Strick Ïawphniaw, Supervisor, DSWO ka la long kum ka Kongsan bad u Bah Vellor Khawmawphlang, Branch Manager, ICI Bank Nongstoiñ kum u symbud kongsan.
Ka Kong Ïawphniaw haba kren kum ka kongsan ha katei ka sngi ka la ïaroh ïa ka NeIPS ba ka la shakri bun snem na ka bynta ki briew ba don jingduna dkhot met ha ka ban kyntiew ïa ka jingnang jingstad ha ka ban kyntiew ïa ka ïoh kam ïoh jam.
U Bah Vellor Kharmawphlang, u la ai jingkyntu ïa ki samla ba ki dei ban pyndonkam hok ïa ka jingshah hikai ba ki ïoh bad ban long ka jingkyrkhu pat na ka bynta jong kiwei bad u la ong ruh ba kam don kano-kano ka kam kaba ïoh suk hynrei donkam ka jingtrei shitom.
U Bah Michael Thongni, CEO ka NeIPS u la ai khublei ïa ka MSSDS, Skills Meghalaya kaba la kyrshan borbah ban pynurlong ïa ka jingangnud ki khun samla kiba bun ha kaba ïadei bad ka sengkam sengjam bad lyngba ka jingkyrkhu ka jong kane ka tnat la pynlong ïa ka NeIPS ban khlaiñ ha ka rukom ban shakri.
