Shillong, Jymmang 08
Ka Balang Katholik ka la ïoh ïa u Pope ba thymmai hadien ba la mih ka tdem lieh na ka atoskhana jong ka Sistine Chapel ha Vatican, kaba dei ka dak ba ki 133 ngut ki Kardinal na kylleng ka pyrthei ki la shim rai.
U Kardinal Robert Francis Prevost u la shah jied kum u Pope bathymmai ka Balang Katholik, bad u dei u Pope uba 267 hadien ka jingkhlad noh u Pope Francis.
U Kardinal Robert F. Prevost un shim ïa ka kyrteng Pope Leo ba 14. La kha ïa U Pope Leo ha Chicago, Illinois, United States. U Pope Leo u don ïa ka rta kaba 69 snem. U la shah jied Kardinal ha u snem 2023 da u Pope Francis.
Ka jingjied ïa u Pope Leo ka dei lyngba ka jingïamynjur lang jong kiba bun napdeng ki 133 ngut ki Kardinal.
Kane ka jingjied ïa u Kpa Bakhuid ka Balang Katholik ka sdang da ka jingïalang kaba kyrpang kaba khot ka Conclave, ha kaba ki Cardinal ki shong hapoh ka Sistine Chapel ha Vatican, ban duwai bad ïatai sani bha, khlem pat pynbna ïa kano kano ka kyrteng haduh ba la mih ka tdem lieh – ka dak ba la jied ïa Pope ba thymmai.
La thep vote arsien shisngi, shisien ha ka por mynstep, bad shisien ha ka por janmiet. Lada ym pat lah ban jied ïa u Pope bathymmai, ka tdem ïong ka mih na ka atoskhana jong ka Sistine Chapel.
Uwei pa uwei u Kardinal u ïoh ïa ka kot ban vote kaba la thoh halor da ka ktien Latin, bad hapoh ka jaka ba suda, u jingthoh u hap ban thoh ïa ka kyrteng jong u Kardinal ba u jied.
Kane ka kot hap ban khylliap tang shiteng. Uwei u Kardinal u ïoh ar lane lai tylli ki kot.
Hadien ba ki Kardinal ki la dep ban thoh ïa ka kyrteng jong uta uba ki jied, la theh ïa ki kot ha ka tiar ba kyrpang hakhmat ka jaka kyntang, bad yn sa shim bad ñiew ïa iwei pa iwei i kot bad thep pat ha kawei ka synduk ba thylli.
Ka jingjied ïa u Pope bathymmai ka donkam ïa ka vote kaba bun, kaba long ar na lai.
