Shillong, Jymmang 08
Kawei ka hostel jong ki kynthei kaba don ha Lummawrie ha Laitumkhrah, ka la shah prong tuh ha uwei u runar bym lah ban ithuh kumjuh ban tuh ïa ki tiar ki tar.
Katkum ka khubor kaba la ïoh na ki pulit la ong ba u Bah Aldridge Sohkhlet u la ai ka jingujor sha ki pulit ba ha ka 6 tarik mynta u bnai, dang ha ka por kumba 9 baje mynstep, uwei u runar bym lah ban ithuh, u la prong tuh hapoh ka Albert Girls Hostel ha Lummawrie, Laitumkhrah, Shillong bad ha kaba u la tuh ïa kawei ka mobile phone, ki jaiñ, ki tiar electronic kiba shongdor kumba T.37,000/- lem bad ka pisa kaba long T.100/-, nalor kiwei kiwei.
Shuh shuh la ong ba une u runar, nalor ba la tuh ïa ki tiar ki tar, u la weng bad pynsniew ruh ïa ki ar tylli ki kor CCTV kiba la pyndait ha kane ka hostel. Ïa kane ka jingjia baroh, la lah ban ïoh ring hapoh kane ka kor CCTV.
Ha kawei pat ka khubor, u Mukesh Kumar Ram u la ujor sha ki pulit ba ha ka janmiet jong ka 6 tarik mynta u bnai, ki runar bym lah ban ithuh, ki la tuh ïa ka arshaka jong u, kaba don ïa u registration number ML05-AD-9003 na ka thaiñ Khyndailad, Shillong.
