Delhi, Jymmang 08
Ha ka jingïakren bad ki lad pathai khubor halor ka ‘Operation SINDOOR’ ha ka 07 tarik u Jymmang 2025, ka India ka la ong ba ka jubab jong ka, ka dei kaba la peit bniah, kaba la antad bad ka bym ïalam sha ka jingkulmar shuh shuh.
La kren shai ba ym shym la thew ïa ki jaka shipai jong ka Pakistan. La pynpaw biang ruh ba kano-kano ka jingther ïa ki jingdon jingem jong ki shipai ha India kan ïoh ïa ka jubab kaba ïahap.
Ha ka miet jong ka 07-08 u Jymmang 2025, ka Pakistan ka la pyrshang ban ïakhun pyrshah ïa ki bun tylli ki jingdon jingem jong ki shipai kiba don ha ka thaiñ shatei bad sepngi jong ka ri India ba kynthup ïa ki Awantipura, Srinagar, Jammu, Pathankot, Amritsar, Kapurthala, Jalaihar, Ludhiana, Adampur, Bhatinda, Chandigarh, Uphalodi, Nal, Phalodi, Uttarlai, bad Bhuj da kaba pyndonkam da ki drone bad ki namding. Ïa kine la pynduh pyndam da ka Integrated Counter UAS Grid bad ki rynsan Air Defence. Ïa ki mar jot kiba la mih na kine ki jingther mynta dang lum na ki katto katne ki jaka kiba pynshisha ïa ki jingther jong ka Pakistan.
Ha ka step jong ka 8 tarik, ki shipai India, ki la ther ïa ki Air Defence Radar bad ki rynsan ha ki katto katne ki jaka ha Pakistan. Ka jubab jong ka India ka dei kaba ïahap bad ka jingleh jong ka Pakistan. La ïoh jingtip kaba shai ba ïa ka rynsan Air Defense ha Lahore la pynduh.
Ka Pakistan ka la pynkhlaiñ shuh shuh ïa ka jingsiat khlem daw jong ka ha kylleng ka Line of Control da kaba pyndonkam ïa ki Mortar bad ki Artillery kiba heh bha ha ki jaka kiba don ha Kupwara, Baramulla, Uri, Poonch, ka thaiñ Mendhar bad Rajouri ha Jammu and Kashmir.
Ki don 16 ngut ki briew ba luilui kiba la duh ïa la ka jingim ha kane ka jingsiat jong ka Pakistan, ba kynthup ïa lai ngut ki kynthei bad san ngut ki khynnah. Hangne ruh ka India ka la hap ban jubab ban pynsangeh noh ïa ka jingsiat Mortar bad Artillery na Pakistan.
Ki shipai India ki pynpaw biang ïa ka jingkular jong ki ban ym pynjur ïa ka jingeh, tangba dei ban burom ruh ïa kane da ki shipai Pakistan.
