Shillong, Jymmang 08
U Myntri ba khmih ïa ka tnat Food & Civil Supplies ka Jylla, Bah Comingone Ymbon u la pyntip ba haduh mynta tang 53 percent ki nongshim khaw rashon ba pynïasoh Aadhaar hapoh ka Jylla, bad ha kajuh ka por u la pyntip ruh ba ka Sorkar India ka la buh por haduh ka 30 tarik Jylliew ïa ki paidbah ka Jylla ban pynïasoh Aadhaar ïa ka card rashon ban bteng ka jingïoh jingmyntoi.
Haba kren bad ki lad pathai khubor ha ka sngi Palei, u Myntri u la ong ba na ka liang ka Sorkar Pdeng ka la ai por ïa ka Jylla haduh ka 30 tarik Jylliew ban pynïasoh Aadhaar, bad kumba ka long mynta ka Jylla Meghalaya ka dei kaba duna tam ban pynïasoh ïa u Aadhaar ne ka e-KYC.
“Ka por ka dang don. Nga kyrpad ïa ki paidbah ba kin wan shakhmat ban pynïasoh ïa u Aadhaar khnang ba kan ym don jingktah ha kaba ïadei bad ka sam khaw rashon,” ong u Myntri.
Katkum ka jingïathuh u Bah Ymbon 2 snem mynshwa ki don tang kumba 20-21 percent kiba pynïasoh Aadhaar, hynrei mynta ka la kham kiew bad don palat 53 percent.
U la ong ba ki paidbah kim dei ban ngeit biej namar don ki briew katto-katne kiba pyrshang ban ïalam bakla bad pynsngewthuh bakla ïa ki paidbah ha kaba ïadei bad u Aadhaar.
“Tang ha Jylla jong ngi ki bym treh Aadhaar, kiwei ki Jylla ha ka Ri ki la palat ïa ka 95-98 percent, balei ha ka Jylla jong ngi tang 53 percent haduh mynta ka sngi? Nga kyntu lang ïa ki paralok kiba pyrshang ban pynsngewthuh bakla ïa ki paidbah, lada jia ba duh khaw ki paidbah sngewbha shim ka jingkitkhlieh ïa kane ka kam,” la maham tyngeh u Myntri.
Haba kylli, u Bah Ymbon u la ïathuh ba ki nongshong shnong kiba ïoh jingmyntoi na ka skhim rashon ka NFSA ki don kumba 21 lak 45 hajar 105 ngut, bad kiba la pynïasoh Aadhaar ki don tang kumba 11 lak 42 hajar 992 ngut ha baroh kawei ka Jylla.
U la pyntip ba ki district kiba duna eh ki briew ba pynïasoh Aadhaar ïa ka card rashon ki dei ha West Khasi Hills, South West Khasi Hills bad Eastern West Khasi Hills.
