Khliehriat, Jymmang 08
Kawei ka longkmie ryngkat bad u khun uba dang 2 snem, ki la shah thang ha u lok jong ka hadien ba u la theh da ka umphniang sharak halor jong ki. Kane ka jingjia kaba sngew triem ka la jia ha ka 5 tarik Jymmang, 2025 ha ka shnong Umstain kaba ha East Jaiñtia Hills District.
Katkum ka khubor na ki pulit la ong ba ïa katei ka longkmie kaba la shah thang la tip kyrteng kum ka Tiara, 30 snem ka rta bad u khun, Abu Sapain ba dang 2 snem, kiba shong ba sah ha kawei ka ïing ba la ai wai ha shnong Umstain, East Jaiñtia Hills District bad kiba dei na Hailakandi, Assam.
Katkum ka khubor kaba ïoh lum la ïathuh, ba hadien katei ka jingjia bad thang ïa la ka lok bad u khun da kaba theh da ka umphniang sharak, utei u briew u la phet krad na katei ka jaka.
Ïa kitei ki ar ngut kiba la ngat ha katei ka jingjia kaba kordit, la pynkit noh mar mar sha ka jaka ai jingsumar ha Lumshnong PHC da ki nongshong shnong bad hadien kane la pynkynriah noh sha Hospital Jowai bad namar ka jingjur jong ka jingmynsaw la pynkynriah noh sha Shillong ban pynïoh ïa ka jingsumar kaba kham biang bad paka.
Halor kane ka jingjia kaba sngew triem na ka liang jong ki pulit hadien ba ki la ïoh ka jingtip, mynta ki dang pynlong ka jingtohkit bad ruh ban thwet ïa utei u lok uba la leh ïa kane ka kam.
