New Delhi, Jymmang 09 (UNI)
Ka Pakistan ka la pyndonkam ïa kumba 300-400 tylli ki ‘drone’ ba la shna da ka Turkey, ban thombor ïa 36 tylli ki jaka ha India, ha ka bynta ka phang Sepngi, ha ka miet jong ka 8-9 tarik u Jymmang.
Ki shipai Pakistan ki la pynkheiñ ruh la bunsien ïa ka jaka suiñ ka India ha baroh kawei ka khappud Sepngi da ka jingthmu ban thombor ïa ki jingtei shipai. Ki la siat ruh da ki tiar siat kiba heh ha shilynter ka LOC bad ka IB.
“Ka Pakistan ka la pyndonkam haduh kumba 300-400 tylli ki ‘drone’ kum ka jingpyrshang ban ïoh rung tuh ha 36 tylli ki jaka naduh Leh haduh Sir Creek. Ki shipai India ki la pyndonkam da ki lad treikam ha ka rukom ka ‘kinetic’ bad ‘non-kinetic’ bad ki la seisoh ha ka ban siat pynhap ïa kiba bun na kine ki ‘drone’,” la ong ka Col. Sofiya Qureshi haba kren halor ka ‘Operation Sindoor’.
“Ka Pakistan ka la pyndonkam ïa ki ‘drone’ Songar ka Türkiye ba la shna da ka nongpynmih tiar ïaleh ka Turkey – Asisgard ha ki jinghiar thma kiba thmu ïa ki jaka shipai ha India,” ka la ong. Kumba ka long, ka Turkey ka dei ka paralok kaba ïajan bha bad ka Islamabad, bad ka la kyrshan ïa ka Pakistan bad kynthoh ïa ka India halor ka ‘Operation Sindoor’. Ha ryngkat ka Wing Commander, ka Vyomika Singh ka la ïathuh ba ki jingwan rung be-aiñ jong ki ‘drone’ ha ki jaka suiñ ba pyrkhing ki thmu ban lap ïa ki jaka ba don ki bor ïada ba treikam na suiñ jong ka India.
Ka India ka la thombor da ki ‘drone’ bad pynpra ïa kawei ka ‘Radar’ ïada (ba ha suiñ) ha Pakistan, ka la ong.
Na ka liang u Secretary ki kam bar-ri, u Vikram Misri haba ai jingkren u la ong ba katba ka Pakistan ka kam ba kim shym la thombor ne hiar thma ïa kino-kino ki jaka mane niam ha India, hynrei ki la hiar thma ïa kawei ka Gurdwara ha Poonch, ha kaba ki don katto-katne ngut briew kiba la shah pynïap.
“Ha ka jaka ban kubur ïa kine ki jingthombor, ka Pakistan ka la kam pynban ïa kaei-kaei ka bym ïahap ba dei ki shipai India bad ki shipai suiñ jong ka kiba kthong ïa ki nongbah kum ka Amritsar bad pyrshang ban kynnoh ïa ka Pakistan,” u la ong bad bynrap ba ka dei shi bynta jong ka jingthmu ka Pakistan ban ïaid shakhmat ne wanrah ïa ka jingïapher ha ki kynhun niam, kaba yn ym lah satia ban jop.
“Ka jingthmu ban pynkhihwin bad pynheh ïew na ka liang ka Pakistan hynnin ka miet la thmu ïa ki jaka sor jong ka India bad ki jingtei jong ki ‘riew paidbah nalor ki katto-katne ki bynta ba ïadei bad ki shipai,” u la bynrap.
“Ki shipai India ki la jubab ha ka rukom kaba biang bad kaba don jingkitkhlieh,” u la ong.
“Nga kwah ban pynpaw ba ka jingkynran dien kaba tikna bad kaba paw pyrthei halor kine ki jingshah thombor ba ka Pakistan ka la ïaid shakhmat da ki tnad treikam ka Sorkar Pakistan ka dei sa kawei pat ka nuksa jong ka jinglong arsap jong ki bad ka jingjylliew ka bathymmai kaba ki pyntuid ha ka thong ban pynsaphriang ïa ki jingtip kiba bakla,” u la kynthoh jur.
Kane ka jinghiar thma jong ka Pakistan ka wan hadien ka ‘Operation Sindoor’ kaba la sdang da ka India ha ka 7 tarik u Jymmang ha kaba ka la thombor ïa khyndai tylli ki ktem lehnoh ha Pakistan bad ka Pakistan Occupied Kashmir (POK) kum ka jingkput kylla halor ka jingthombor ha Pahalgam.
