Shillong, Jymmang 09
Hadien ka kynrum-kynram kaba la mih hapoh ka skulbah North Eastern Hill University (NEHU) mynta la bun bnai, u Myntri ba khmih ïa ka tnat Pule-Dangle ka Sorkar India, Dharmendra Pradhan u la bthah ïa ka tnat ban leh ïa kaba donkam ha kaba ïadei bad ka jingdawa weng ïa u Prof. Prabha Shankar Shukla na ka kam Vice Chancellor.
Haba pyntip ïa kane ha ka Sngi Thohdieng, u MLA ka BJP uba dei ruh u Myntri ka Sorkar Jylla, Bah Alexander Laloo Hek, u la ïathuh ba hadien ba u la phah ïa ka shithi sha u Myntri ka Sorkar Pdeng, u la ïoh ïa ka jubab ha ka Sngi Thohdieng ka 9 tarik Jymmang, kaba pyntip ba u Myntri ka Sorkar Pdeng, Dharmen-dra Pradhan u la bthah ïa ka tnat ba dei khmih ba kan leh ïa kaba donkam.
Katkum ka jingïathuh u Bah Hek, ha ka shithi ba la jubab da u Myntri Sorkar Pdeng la thoh, “Ïa kane ka kam la phah sha ka tnat ba dei khmih na ka bynta ban leh ïa kaba donkam.”
U Bah Hek u la ïathuh ba u la thoh shithi sha u Myntri ka Sorkar Pdeng ha ka 3 tarik Ïaïong 2025, bad pyntip ba ha ka shithi u la bsut lang ruh ïa ka shithi ba u la ïoh na ka NEHU Students’ Union bad KSU NEHU Unit, ha kaba ïadei bad ka jingdawa ban weng noh ïa u Vice Chancellor ba mynta bad ban thung Vice Chancellor bathymmai ha katei ka skulbah. Haba kylli ba ka Sorkar Pdeng ka shim sting ïa kane ka kam ha NEHU, na ka liang u Myntri ka Jylla u la kyntait da kaba ong, “Lada ka Sorkar India ka shim sting ïa kane ka kam kin ym jubab satia ïa ka shithi jong nga ki jingkyrpad jong nga.”
Lah ban kdew ba ka jingdawa ban weng ïa u Prof. Shukla na ka kam Vice Chancellor ka la jur bha naduh u Naiwieng mynshem snem, ha kaba ki samla pule katei ka skulbah hapoh ka jingïalam ka NEHUSU bad KSU NEHU Unit ki la pynlong da ka jingïakhih haduh ba u Prof. Shukla u la hap ban mih noh na Campus.
Kumba ka long mynta ïa ki kam hapoh NEHU la pynïaid da ka Acting Vice Chancellor, Prof. S.M Sungoh.
