Khliehriat, Jymmang 09
Ka longkmie ryngkat u khun ba dang 2 snem rta kaba la kynnoh ba ka la shah thang ha u lok jong ka hadien ba ula theh umphniang sharak halor jong ki ka la mih na hospital khlem ka jingmynjur ki doktor.
Kane ka jingjia kala jia haka 5 tarik Jymmang ha iingwai haka shnong Umstain East Jaintia Hills Ditsrict.
Hadien katei ka jingjia ïa kitei ki arngut la pynkit noh mar mar sha Lumshnong PHC da ki nongshnong shnong bad hadien la phah sha Hospital Jowai bad nangne la pynkynriah sha Ganesh Das Maternal & Child Health Hospital, Shillong ban ioh ïa ka jingsumar kaba kham paka. Hynrei ki pulit ka East Jaintia Hills District haba buddien halor katei ka jingjia ki la lap ba katei ka longkmie ryngkat bad la u khun kila mih noh na katei ka hospital khlem ka jingmynjur ki doctor ha ka 7 tarik Jymmang bad leit sha Silchar, Assam. Nalor kata, katei ka longkmie kaba la mynsaw kam shym la ai ïa ka jaka sah kaba pura jong ka lane ïa u number phone ba lah ban ïakren bad ka. Ka khubor pulit ka iathuh ba katei ka longkmie katkum ka jingïathuh jong ka sha ki nongtrei ka hospital, ka la ong ba ka la mynsaw namar ka jinging ding na u mombati.
