Shillong, Jymmang 09
U Bah Shemborlang Rynjah, Chief Executive Member (CEM) jong ka Khasi Hills Autonomous District Council (KHADC) u la ïoh ban ïashim bynta ha ka tamasa leh niam shwa ban bet symbai Thoh Lyngdoh ba la pynlong da ki jaidbynriew Khasi Kherwang ha Mynser, Karbi Anglong kaba la pynïaid da ka Seng Raid Kherwang ha ka 9 tarik u Jymmang 2025.
Ïa kane ka jinglehkmen kaba la pynlong ban burom ïa ki riti-dustur kiba la rim bha shwa ban bet ïa ki jingthung, la ïakynduh da ka jingkmen bad jingsngewtynnad na ki paidbah nongshong shnong.
U Bah Shemborlang uba la tip kum ka jingburom kaba khraw ïa ka pateng bad ka shnong ka thaw, u dei u nongmihkhmat marwei na KHADC ban wan sha katei ka tamasa, da kaba pyndonkam ïa ka lad ban pyni ïa ka jingïatylli bad ki tynrai jaitbynriew.
Ïa ka jingwan jong u la pdiang burom da ki paidbah Khasi Kherwang, kiba la dap da ka jingkmen ban sakhi ïa uwei u CEM ka KHADC.
U Bah Pynshngaiñlang Rattane, President ka United Karbi Peoples’ Organisation (UKPO) bad u nongai jingmut jong ka Seng Raid Kherwang, u la pynpaw ïa ka jingïaroh halor ka jingïashim bynta jong u Bah Rynjah da kaba ai khublei ïa ka jingpyrshang jong u ban pynkhlaiñ ïa ka jingïatylli jong ki jaitbynriew bad ka jinglong kyrpang jong ka riti-dustur. Ha kane ka sngi la ïadonlang ruh u EM ka KAAC, D. Uphing Maslai bad u Deputy Speaker, Avijit Kro, u nongwad bniah jong ka Bhoktoram Mawroh, u Avner Pariat kum nongtrei ka imlang-sahlang kiba la ïashim bynta ha ki jinglehniam tynrai, kaba pynpaw ïa ka mynsiem kynthup lang jong kane ka tamasa.
Ka jinglehniam Thoh Lyngdoh ka dang ïai bteng ban long ka dak kaba kongsan jong ka jingkyrmen ha ka rep ka riang bad ka burom jong ki kpa tymmen, kaba la pynlong kham kongsan shuh shuh da ka jingdon jong ki nongïalam kiba ithuh ïa ka jingdonkam jong ka ha ka kolshor.
Haba ai jingkren bad ki nongthoh khubor hadien ba la kut ka jinglehniam, u Bah Shemborlang u la ong ka jingïuhkjat ha kane ka shnong Mynser ka dei hadien ba ki nongïalam ki la wan ïakynduh ha ophis treikam jong u ban sakhi ïa kane ka jinglehniam. U la pynpaw ka jingsngewkmen ban ïohi ba ki khun ka Bri Hynñiewtrep ban shong shnong ha Karbi Anglong district, kum ka jait Shadap bad kiwei de ban pyndep ïa ka niam ka rukom.
U la ïathuh ruh haba u la ïohpdiang ïa ka dorkhas na ki paradoh parasnam kiba sah ha Karbi un sa bishar bniah.
