Singapore, Jymmang:
Ka Singapore ka la kyntu ïa ki paidbah nongshong shnong ba kin sangeh noh na baroh ki jing-leit jingwan ki bym donkam eh sha Jammu & Kashmir ha India bad sha Pakistan, katba ka jingïakynad hapdeng kine ki ar tylli ki ri ka dang jur.
Ka tnat kam bar ri jong ka Singapore, ha ka Sngi Palei ka la bthah ïa ki nongleit nongwan na katei ka ri ba kin long kiba husiar bha, khamtam ha ki jaka khappud hapdeng ka Pakistan bad ka India.
La ai jingmut ïa ki nong Singapore ha India bad Pakistan ba kin long kiba husiar bad ban shim ïa baroh ki lad jingïada naka bynta ka jingshngaiñ shimet- shimet, kynthup ban kiar na ki jingïalum paidbah, ban buddien bha ïa ki khubor na katei ka ri ban kohnguh ïa ki jingbthah jong ki bor synshar ri.
Kane ka jingpynbna bad ka jingmaham ba thymmai na ki bor pyniaid jong katei ka ri, ka dei ka jingpynthymmai halor ka jingpynbna kaba la pynmih ha ka 30 tarik u Lber, kaba la maham tang ban leit sha ki “jaka ba don jingma” ha Pakistan.
Ka tnat kam bar ri jong ka Singapore ka la kyntu ruh ia ki nong Singapore kiba don ha India bad Pakistan ba ki lah ban pan jingiarap na ki tnat ba dei khmih kiba don ha kitei ki ri lada ki donkam ia kino- kino ki jingïarap ba ki iakynduh jingeh ha kane ka por.
Kumta la ong ba ka tnat jngohkai pyrthei jong ka Singapore ki dang bishar bniah biang ïa ki jingleit jngohkai pyrthei sha Jammu and Kashmir bad sha Pakistan.
Namar la ong ba ka jingiakynad hapdeng ka India bad Pakistan ha kane ka por, ka la pynthut ïa ka leit ka wan, ha kaba palat 50 tylli ki liengsuiñ ban leit bad wan na Pakistan la pynsangeh noh bad katto- katne ki kompeni liengsuiñ jong ka Asia ki la pynkylla lynti ne pynsangeh noh ïa ki liengsuiñ jong ki.
