Shillong, Jymmang 09
Ka Wahniangleng ka dei kawei na ki jaka jngoh kai pyrthei kaba hap ha ka shnong Khatar Mer, Mylliem Constituency namar ki nongjngoh kai pyrthei haba ki poi sha kane ka jaka ki ong ka ‘Mini Switzerland’ namar harud jong kane ka wah don ki ksehbilat kiba jrong bad ka madan kaba don ïa ki phlang kiba jyrngam.
Ka jingong jong ki nongjngoh kai pyrthei ba ka Wahniangleng ka long kum ka ‘Mini Switzer-land’ ka dei namar ki ksehbilat ki mih ryntih sha shiliang ka wah kaba hap ha thaiñ Laitkroh.
Katkum ki dur ki dar bad ki durkhih jong ka Pahalgam kaba la pyllait ha rynsan lad pathai, ka Wahniangleng ka jan ïasyriem namar ki nongjngoh kai pyrthei ki ju khot ‘Mini Switzer-land’ haba ki poi ha Pahalgam kaba hap ha Jammu & Kashmir namar ki kham bun ki ksehbilat, ki phlang ba jyrngam ha madan.
Ban poi sha Wahniangleng hap ïaid na surokbah ka lad na Mylliem 12 Mer kumba 3 minit da ka kali ha jaka ïeng kali bad na jaka ïeng kali hap ïaid kjat kumba 30 minit namar hap hiar ïa ka lynti kaba khohruh-khohram.
Ban tip kham bniah ïa ka jingitynnad jong kane ka jaka jngoh kai pyrthei, U Nongsaiñ Hima na Shillong u la leit hiar dalade ban ïaid kjat shaduh Wahniangleng kaba la lap shisha ïa ka jingitynnad namar ka jingïoh ban ring mynsiem ïa ka lyer kaba khuid bad pyngngad.
Nangta, ha kane ka jaka ka long kynjah namar ki pah tang ki sim hajrong dieng bad ka jingsawa haba tuid ka wah Umtyngngar kaba ïaid suki haba poi shajan ka madan kaba don ki phlang jyrngam kaba tuid beit-beit sha ka dam Mawphlang kaba dei ka jaka sam um ïa ka sor Shillong.
Ïa kane ka jaka jngoh kai la thoh ‘Bulls Trek Wahniangleng’ namar katkum ka jingïathuh khana ba kane ka lynti mynshwa ka dei kaba ju ïaid ki muid.
Ha kane ka jaka jngoh kai ki don lai tylli ki shnong kiba ker tawiar kawei kaba wan ïaid kjat ki nongjngoh kai ka dei na 12 Mer, sha shiliang ka wah ba wan na Umtyngngar ba don ki ksehbilat ka dei ka jaka jong ka Laitkroh bad sha shiliang kawei ka wah ka dei na ka shnong Mawreng.
Kane ka jaka jngoh kai pyrthei ka la sdang ban paw pyrthei hadien ba la kut ka khlam Covid-19 hynrei la sdang ban pynitynnad shuh shuh mynta la ar snem kynthih.
Haba ïoh ban ïakren bad u Bah B. Sohtun uba dei Manager jong kane ka jaka, u la ïathuh ba ki briew mar shu poi ha kane ka jaka ki ong beit kum ka ‘Mini Switzerland’ namar ki itynnad ïa ki phlang ba jyrngam bad ki don ki ksehbilat harud jong ka wah.
U la ïathuh ba ki don briew kiba nabar ka jylla ki wan sah da ki taïew namar ki sngewtynnad ban ïaid kjat namar kane ka jaka ka dei kaba pyngngad.
U la pyntip ba ym shah ban jngi hynrei la shah ïa ki ban shong ha ka lieng ba kin bam lyer pyngngad.
Shuh shuh u la pyntip ba kane ka Wahniangleng ka la sdang ban paw pyrthei ïa ka jingitynnad hadien ka jingkhangdam baroh shi pyrthei namar ka jingwan jong ka khlam Covid-19.
