Shillong, Jymmang 09
Ka Indian Premier League (IPL) ha ka Sngi Thohdieng ka la shah pynsangeh khlem buh por namar ka jingjur jong ka jingïakhun thma hapdeng ki shipai ka India bad ka Pakistan ha kaba uwei na ki heh jong ka BCCI u la ong ban bteng ïa kane ka jingïalehkai ha ka jinglong jingman kaba mynta kan ym long kaba dei. “Kam long kaba bha ba ka jingïalehkai kriket kan ïaid shaphrang katba ka ri ka dang don ha ka thma,” la ong u heh jong ka BCCI ha ka PTI, da kaba pynthikna ïa ka jingpynsangeh ïa kane ka lympung kaba pawnam, kaba dei ban kut noh ha ka 25 tarik u Jymmang ha Kolkata katkum ka por ba la buh ryntih.
Hadien ka jingpynsangeh jong ka BCCI ïa kane ka lympung kan peit ban pynlong ïa ki jingïalehkai kiba dang sah ha ka por kaba biang hynrei ki jingtip ba bniah jong kata ka jingthmu kin sa mih tang hadien ba ka jingïaleh thma ka la nang jai jai.
Ki khatar tylli ki jingïalehkai league bad saw tylli ki knockout ki long kiba dang sahteng.
Ka India ka la siat da ki ‘namding ïa ki jingtei jong ki lehnoh ha Pakistan bad ka Pakistan ka la bat ïa ka Jammu & Kashmir artaïew hadien ka jingthombor jong ki lehnoh ha Pahalgam ha ka 22 tarik u Ïaïong ha kaba 26 ngut ki briew ki la ïap.
Ha ka Sngi Palei, la pynjari ïa ka jingpynlip bording ha ki katto-katne ki district ha India ba kynthup ïa ka Pathankot, Amritsar, Jalandhar, Hoshiarpur, Mohali ha Punjab bad Union Territory Chandigarh hapdeng ki jingpynbna jingher ki liengsuiñ (air raid) bad ka khubor ba don ki jingsawa kum ki jingbthei ha Jammu.
Kham shuwa ha kane ka sngi, la pynkynriah noh ïa ka Pakistan Super League sha UAE hadien ba ki drone jong ka India ki la thombor ha Lahore bad Rawalpindi nalor kiwei pat ki nongbah.
Ka jingïakhun thma ka la pynmih ïa ka jingsngewkhia kaba jur bha hapdeng ki nongïalehkai bar ri, ong ki tyllong khubor na ka league bad kin sa leit phai noh ha kine khyndiat sngi ban wan. Ki 62 ngut nongïalehkai bar ri ki la shah soi ha 10 tylli ki kynhun ha ka ïew die lilam kaba heh mynshem snem.
“Ki nongïalehkai ki don ha ka jinglong-jingman kaba biang, hynrei hooid ka don ka jingsngewkhia hapdeng jong ki hadien ba ki la ïohi ïa baroh kaba la jia”, la ong uwei u heh jong ka kynhun IPL ha ka PTI haba la kylli ïa ka jinglong-jingman jong ki nongïalehkai bar ri.
Ha ka Sngi Thohdieng, ka jingïalehkai jong ka IPL ka la don ha Lucknow na ka bynta ka jingïakhun hapdeng ka Lucknow Super Giants (LSG) pyrshah ïa ka Royal Challengers Bengaluru, kaba la sahkut noh mynta namar ka jingpynsangeh.
“Ka jaitbynriew nyngkong eh”, la thoh ka LSG ha ka rynsan lad pathai khubor hadien ba la pynsangeh noh ïa kane ka league.
