Shillong, Jymmang 09
U MLA ka United Democratic Party (UDP) uba dei ruh u Nongai-ktien bad Myntri Sorkar, Bah Paul Lyngdoh u la ong ba um tip satia kaei kaba pynlong ïa ka Congress bad ka Voice of the People Party (VPP) ba kin kyntait ban don bynta ha ka jingïasyllok hapoh ka All Party Com-mittee (APC) ha kaba ïadei bad ka mat lynti rel.
Haba kren bad ki lad pathai khubor ha ka Sngi Thohdieng, u la Bah Paul u la ong ka mat lynti rel ka dei ka mat kaba khluit bha kaba la ïakren na ka por sha ka por, bad bynrap ba lada ka long kumta ki jingpyrshang baroh kin pulom noh bad kan dang ïai bteng hi ha ka jingbym lah ban shim rai.
U Myntri u la ong ba um tip kaei ka pynlong ïa ki ban pynbna ïa kum kata ka rai.
U la bynrap da kaba ong ba kane ka dei ka mat kaba khluit haduh katta-katta kaba la ïakren na ka por sha ka por, bad kum ka Sorkar ka pyrkhat ba ka All Party Committee (APC) kan dei ka rynsan kaba biang tam.
“Kane ka dei ka kam kaba khluit haduh katta-katta, ngi sngew ba ka All Party Committee kan dei ka rynsan kaba biang eh ban ïohsngew ïa baroh ki jingai jingmut, ki jingkynthoh ba pyrshah bad ki jingkynthoh bym shah liang,” la ong u Bah Paul.
U Bah Paul u la ong shuh-shuh ba lada mih kum kane ka rai, ka mut ba kine ki jingpyrshang baroh kin pulom noh bad kan dang ïai bteng hi ha ka jingbym lah ban shim rai ïa kane ka kam.
Haba kylli pat na u MLA ka BJP uba dei u Myntri Sorkar, Bah Alexander Laloo Hek, u la ong ba ka shong ha ka mon jong ki.
“Kata ka shong beit ha ki, ngam don eiei ban tuklar ïa kiwei ki seng saiñ pyrthei. Ngam don eiei ruh ban kren ïa ka rukom pyrkhat jong kiwei, ngi tip tang ïa ka rukom pyrkhat lajong,” u la ong.
Ki ar tylli seng saiñ pyrthei kiba don ha ka Liang Pyrshah ha ka Jylla, ka VPP bad ka Congress ki la pynbna ba kin ym treh satia ban ïashim bynta ha ka jingïalang jong ka All Party Committee kaba la thaw da ka Sorkar Jylla ban ïasyllok ha kaba ïadei bad ka jingpynïasoh hapoh ka Jylla, khamtam ha Khasi bad Jaiñtia Hills.
