Shillong, Jymmang 09
U Bah Lahkmen Rymbui uba dei u MLA ka Amlarem konstitwensi kaba don markhap bad ka Bangladesh, u la ong ba ka khappud Bangla-desh ba hap hapoh Amlarem ka don ïa ka jingjrong kumba 40 km bad na kane tang kumba 2 km ki dei ki jaka ba la dep ban ker sainar shiah.
Haba kylli halor ka jinglong jingman ha katei ka khappud ha kane ka por ba don jingïakynad, khamtam ka jingsynjor ka saiñ hima-sima ha Bangladesh, u Bah Rymbui uba dei ruh u Myntri Kam Pohïing barim ka Jylla, u la ïathuh ba ïa mynta ki khappud ha ka katei ka thaiñ ki long kumba ju long bad ka shngaiñ.
“Ha ka konstitwensi jong nga ka jingjrong jong ka khappud bad ka Bangladesh ka don 40 km, na kata kumba 2 km harum haneng la dep ban ker, katba kaba sah ym pat shym la ker satia. Ha kaba ïadei bad ka jinglong jingman mynta, da ka jingpeitngor jong ki BSF bad ki pulit ka long jai-jai,” u la ong.
Ha kajuh ka por, u la ong ba ka daw ba ki briew ki pyrshah ïa ka jingker sainar shiah ka dei namar ba ki pyrkhat ïoh kin duh lut ïa ki jaka-puta bad wat ki jaka sah ne ki shnong kin hap shabar ka jingker sainar shiah.
“Ka don ka jingsngew jong ki nongshong shnong ba lada ker 150 yard, bun ki surok na Dawki sha Muktapur kin hap shabar ka jingker bad katto-katne ki shnong ruh kin hap shabar ka jingker. Kane ka jingsheptieng jong ki paidbah ka pynlong ïa ki ban pyrshah ïa ka jingker sainar ha khappud,” la ong u Bah Rymbui.
U la ong ba ka jingpyrshah ka long tang lada ker haduh 150 yard na ‘zero line’, hynrei lada ker na jan jong u ‘zero line’ kan ym don than ka jingduh ïa ka jaka-puta, ki jaka rep kim sngew eiei lada leh kumta.
Haba pynshong nongrim ïa ki jingjia ïakynad kaba la mih ha kine ki sngi, u Bah Rymbui u la ong ba donkam ban pynshai ïa ki paidbah ïa kaei ka jingshisha na ka jingkylla ka jinglong jingman.
“Ka jingker ïa ki khappud ka dei kaba donkam mynta. Ka Sorkar bad ki ophisar ki dei ban leit sha ki paidbah ha kata ka rukom ba ki lah ban sngewthuh, ba ka don ka jingkylla ha ka jinglong jingman ha kaba ka jingker ïa u pud u sam ka long kaba kongsan,” la ong u Bah Rymbui.
