Nongstoiñ, Jymmang 09
Ka skul Assembly of God Secondary School Siejlieh, Nongstoiñ ka dei kawei na ki skul kaba la pawbha ha ka jingpyni nam ïa ka jingnang pyndonkam ki khynnah skul ïa ki tiar ha ka ‘Science Exhibition’ kaba kane ka skul ka la ju jop bunsien ïa ka namjop kum ka lahduh banyngkong ha ka ‘Science Exhibition’ kata ka long ha ka District Level bad ha ka ‘State Level’.
Kane ka skul ka la ïashim bynta haduh san sien ha ka ‘District Level’ bad ka la jop ruh baroh san sien da kaba rah ïa ka nam banyngkong bad ha ka ‘State Level’ pat ka la ïashim bynta haduh san sien hynrei ka la jop tang haduh saw sien kynthup ar sien ha ka ‘Sub-theme Computational Thinking’, shisien ha ka ‘Sub-theme Life’ bad shisien pat ha ka ‘Sub-theme Waste Management’. U la ong ruh ba kane ka skul shisien ka la poi ruh haduh ka ‘National Level’ ïa kaba la pynlong ha nongbah Kolkata kata ha u snem 2019, ym tang katta hynrei katei ka skul ka la leit ban ïashim bynta ruh ha ka ‘Northeast Science Fair 2024’. Haduh mynta u snem ruh, katei ka skul ka dang paw ha katei ka jingpyni nam lyngba ka jingdon ka heprit Kanwanwad Thyrniang kaba dang shong ha ka Class X kaba dei ka khun jong u Bah Arphul Kharbani bad ka Kong Isildamary kiba dei na ka shnong Mawkadiang, kawei na ki shnong khapsor Nongstoiñ.
La ong ba katei ka heprit ka la ju ïashim bynta ha ka ‘District Level Science Exhibition’ bad ha ka ‘State Level Science Exhibition’ ïa kaba la pynïaid da ka DSEL bad ha katei ka jingïashim bynta ba ka Kanwanwad Thyrniang ka la leit haduh lai sien ha ka ‘District Level’ baroh lai sien ka la ïoh ïa ka nam nyngkong kata ka long ha ka ‘overall’ laisnem lynter kata ha u snem 2023, 24, 25, katba ha ka ‘State Level’ pat, ka la ïashim bynta haduh 3 sien hynrei ka la ïoh ïa ka nam banyngkong tang haduh 2sien kata ha u snem 2023 bad 2025. U Dr. Rev. M.S. Nongrem kum Headmaster jong katei ka skul ha ka jingïakren u la ong ba kane baroh ka dei ka jingtrei shitom ki khynnah skul hi ryngkat ka jingïalam lynti uwei na ki nonghikai ‘Science’ ka skul, kata u Babu Khampher Puweiñ.
