Shillong, Jymmang 09
Ka North-Eastern Hill University (NEHU), Shillong, ka la pynlong ïa ka prokram pynkup burom ha ka 9 tarik Jymmang, 2025 kum ka dak ka jingpyndonburom ïa u Prof. David R Syiemlieh uba la ïohpdiang ïa ka khusnam Padma Shri jong u snem 2025.
Ha kane ka prokram, la sakhi ïa ka jingïashim bynta da ki ‘riewshemphang ka skulbah, ki samla pule barim, ki nonghikai, bad ki nongkyrshan kiba la ïalum lang ban ai burom ïa u ‘riewstad ba pawnam ha ka liang ka jingpule bad ka jingsynshar.
La sdang ïa kane ka prokram da ka jingkren pdiang burom na ka Prof. Cecile A. Mawlong, ka Dean jong ka School of Social Sciences, kaba la pdiang sngewbha ïa u Prof. David R Syiemlie.
Ka Prof. Mawlong ka la kdew ba ki jingjop jong u Prof. Syiemlieh ki “kren shibun” shaphang ka jingaiti jong u ha ka jingnang jingstad, bad ba wat la u la poi sha ka tduh jong ka jingjop, u dang long uba don nongrim, uba sbun, bad uba ïadei bha bad ki tynrai jong u.
Ka la ïaroh ïa ki jingnoh synñiang kiba khraw jong u ha ka jingthoh histori jong ka thaiñ shatei lammihngi jong ka ri India, khamtam eh jong ki thaiñ Khasi bad Jaiñtia.
Na ka liang u Prof. Shobhan N. Lamare, Head ka tnat History bad u samla pule barim jong u Prof. Syiemlieh, u la ong ba u Prof. Syiemlieh u long kum “ka duriaw kaba heh jong ka jingtip” katba ka jinglong rit mynsiem jong u ka la iehnoh ïa ka jingkynmaw kaba jylliew ha baroh kiba ithuh ïa u.
U Prof. Lamare u la ïasam ïa ki jingkynmaw ba sngewtynnad shaphang ki jingïalang Khristmas ba la pynlong da u Prof. Syiemlieh, ka jinglong jong u ban thied jingthied hi ha Ïewduh, ka Ïew tynrai jong ka Shillong, ha kaba ka jingïadei bad ki nongdie dukan ha ka thaiñ ka dang sah kum ka khanatang.
Haba ai jingkren na ka liang ki nonghikai, u Professor ba la san bha jong ka skulbah, u Prof. Saha, u la ïaroh ïa u Prof. Syiemlieh kum u ‘riewstad uba la wanrah ïa ka sur, ki jinglong, bad ka jingthmu jong ka thaiñ shatei lammihngi sha ki rynsan jong ka ri bad ka pyrthei.
“Um dei tang u nongthoh histori, hynrei u nongsumar ïa ki histori ba jylliew jong ka thaiñ,” ong u Prof. Saha.
Ka Prof. S. M. Sungoh, Vice-Chancellor Incharge, ka la pynpaw ïa ki jingnoh synñiang ba bun jait jong u Prof. Syiemlieh.
Ka la ong ba ki jingjop jong u ki long ka jingpynpaw ym tang ïa ka jingtbit shimet hynrei ïa ka bor jong ka jinglong rit mynsiem, ka jingnang jingstad, bad ka jingshakri.
“Ka kam jong ka jingim jong phi,” ka la ong, “kam shym la pynshai tang ïa ki lynti pule hynrei ka la wanrah ruh ïa ka jingsarong kaba khraw ïa ki briew jong ka Meghalaya bad ka thaiñ Shatei Lam Mihngi.”
Ha ka jingkren na ka liang u nongïohpdiang khusnam Padma, Prof. David R. Syiemlieh, u la pynpaw ïa ka jingsngewnguh kaba khraw ïa ki tnad skul, kolej bad ki jaka treikam kiba la saiñdur ïa ka jingïaid lynti jong u- ka Dr. Graham’s Home, ha Kalimpong; St. Edmund’s Kolej, Shillong; bad ka NEHU.
Haba pyrkhat ïa ki sngi jong u ha ka Tnat treikam paidbah jong ka Sorkar Pdeng (UPSC), u la kren shaphang ki jinglong ba u bat, khamtam eh ïa ka jingaiti jong u ban kynthup lang bad ban ithuh ïa ki nongtrei ba kyrshan.
Ka rukom kaba la buh kyrpang kaba u la sdang ha ka por ba u dang don ha ka UPSC ka long ban khot ïa ki nongtrei, ki peon, ki steno bad ki secretary ban ïa dih sha ha ka kamra ïakynduh ba la pynkyntang ha ka sngi Khrismas – ka jingleh kaba bun ki dang kynmaw sngewbha haduh kine ki sngi.
U Prof. Syiemlieh u ai burom ïa ka jingïohpdiang ïa ka khusnam Padma Shri jong u ha ka bynta kaba khraw ha ka NEHU, ha kaba ka kam jong u kum u nonghikai, nongpynïaid, bad nongpynïaid ka la roi bha.
U la ai khublei ïa ki khynnah pule jong u, kiba bun na ki, ki la nangroi bad kiba la kylla long ki ‘riewstad ba pawnam- kynthup ïa u Prof. Shobhan Lamare da kaba pynpaw ïa ka jingsngew sarong ïa ki jingjop jong ki.
U la kynmaw ruh ïa saw ngut ki nonghikai bad ki paralok jong u kiba kynthup ïa u Prof. J. B. Bhattacharjee, u Prof. Imdad Hussein, u Prof. Milton Sangma, bad u Prof. JB Singh.
U la pynkut da kaba ïathuh ba wat ha ka por ba u long kum u nongsynshar ba ha khlieh duh ha UPSC, ka jingieit jong u ïa ka histori kam shym la duna satia, kumba la pynshisha da ka jingpynmih jong u ïa lai tylli ki kot ha ka por ba u don ha ka kam UPSC kum u Chairman.
La pynkut ïa ka prokram da ka jingai khublei na u Prof. S. Umdor, uba la pynpaw ïa ka jingsngew sarong lang jong ka NEHU halor ki jingjop jong u Prof. Syiemlieh.
