Shillong, Jymmang 09
Ka Seng Kynthei Lachmiere ha ryngkat ka jingïatreilang bad ka Dorbar Shnong Lachumiere ha ka 9 tarik u Jymmang, 2025, ka la pynlong ïa ka tamasa die jingbam bad khring ruh ïa kiba bun ki paidbah nongshong shnong ban ïashim bynta ha kane ka tamasa.
Ïa kane ka tamasa die jingbam, la plie paidbah da ka Deputy Commissioner ka East Khasi Hills District, Kong RM Kurbah kaba la long kum ka kongsan ha ryngkat ka jingïadonlang u Rangbah Shnong ka Dorbar Shnong Lachumiere, Dr. Aman War, ka Nongaiktien jong ka Seng Kynthei Lachumiere, ka Kong Theilin Phanbuh, ki paidbah nongshong shnong nalor kiwei-kiwei.
Haba ai jingkren ha katei ka sngi, ka Kong Kurbah ka la ong ba ka jingpynlong ïa kum kine ki jait prokram hapoh ki shnong-ki thaw, bunsien ka ju wanrah ïa ki nongshong-shnong ha kawei ka jaka ba kin ïalum lang bad ban ithuh iwei-ïa-ïwei.
“Ngi donkam ïa ki nongïalam kiba trei shitrhem namar lada ngi don ïa ki nongïalam kiba tbit, kin long kiba ïohi jngai bad ki ju wanrah ïa shibun tylli ki jingmut bad ki jingkyrmen hapoh ka imlang-sahlang”, ong ka Kong RM Kurbah.
Na ka liang u Rangbah Shnong, Dr. Aman War u la pynpaw ka jingsngewkmen kaba khraw ïa ka jingwan ban don ryngkat ka Deputy Commissioner ka East Khasi Hills District, ka Kong RM Kurbah, kaba la ju ïai ai mynsiem ïa ka Dorbar Shnong na ka por sha ka por.
Utei u Rangbah Shnong u la ong ba ka jingthmu ba la pynlong ïa katei ka jingïadie bam ka long ban yn lah ban pynmih ïa u synñiang u bynhei na ka bynta ki kam ba radbah jong ka Seng Kynthei kiba la ju ïadonbynta ban trei shitom baroh shikatta.
“Kane ka dei ka jingsdang banyngkong ban shimbynta shitrhem da kaba pynbeit ïa kane ka tamasa ïadie-ïathied. Kin dang don shuh sa kiwei ki prokram kiba ïadei na ka bynta ka bha-ka miat jong ka imlang-sahlang bad kane kan long ryngkat ka jingïatreilang bad ki bor ka Sorkar”, ong u Dr. Aman War.
