Shillong, Jymmang 09
U coach ka kynhun ïalehkai phutbol ka ri India u Manolo Marquez u dang shaniah tylli ha u khlur ïalehkai ba la shongthait, u Sunil Chhetri, hadien ba u la kynthup lang ïa u ban don hapoh ka thup jong 28 ki rangïalehkai na ka bynta ka AFC Asian Cup 2027 Final Round qualifiers ka ban long ha u bnai ban wan.
U Chhetri, 40 snem ka rta, u la shah pynbor ban mih na kaba shongthait ha u Lber, hadien ba u la shim ïa katei ka rai mynshem snem lyngba ka jingshim bynta ka jong u la kumba arphew snem. Naduh katei ka por u la mihkhmat ïa ka kynhun ïalehkai jong ka ri ha ka jingïalehkai paralok pyrshah ïa ka Maldives bad kumjuh ha ka AFC Asian Cup 2027 (qualifier) pyrshah ïa ka Bangladesh.
“Ki nongïalehkai kiba la shah kynthup, kin ïalum lang ha Kolkata ha ka 18 tarik mynta u bnai, ban kilnamet na ka bynta ki lympung ïalehkai bar ri jong ka FIFA ki ban ha u Jylliew”, la ong ka kyrwoh jong ka All India Football Federation (AIFF) ha ka sngi Balang.
Kumba ka long ka India ka la don ha ka Group-C jong ka AFC Asian Cup 2027 Final Round qualifiers ryngkat ka Bangladesh, Hong Kong China bad ka Singapore, ha kaba ïa ki jingïalehkai yn pynlong ha ïing bad shabar.
Te kumta ka India kan ïakhun pyrshah ïa ka Hong Kong ha ka 10 tarik u Jylliew ha Kai Tak Sports Park, kaba ha Kowloon.
Katba ki ar tylli ki jingïalehkai ba la lah ha ka Group-C, hapdeng ka India bad ka Bangladesh ha Shillong, bad hapdeng ka Singapore bad Hong Kong, China, ha Singapore, ki la kut ha ka jingïakhaid na ka bynta ban ïasam mar shi point.
“Kum shi bynta jong ka jingpynkhreh jong ki na ka bynta ka jingïakhun jong ka Asian Cup pyrshah ïa ka Hong Kong, ka India kan kilanmet haduh 10 sngi ha Kolkata shwa ba kan her da ka liengsuiñ sha Bangkok ban ïakhun ïa ka FIFA International Friendly pyrshah ïa ka Thailand ha ka 4 tarik u Jylliew. Hadien kane ka kynhun kan leit sha Hong Kong na ka bynta ka jingïakhun ïa ka Asian Cup qualifier jong ki,” la ong ka AIFF.
Ki kyrteng ki rangïalehkai ki ban kilanmet ha Kolkata
Goalkeeper: Hrithik Tiwari, Vishal Kaith, Gurmeet Singh Chahal & Amrinder Singh.
Defender: Naorem Roshan Singh, Rahul Bheke, Konsham Chinglensana Singh, Anwar Ali, Thangjam Boris Singh, Sandesh Jhingan, Asish Rai, Subhasish Bose, Mehtab Singh, Tekcham Abhishek Singh & Nikhil Prabhu.
Midfielder: Suresh Singh Wangjam, Naorem Mahesh Singh, Ayush Dev Chhetri, Udanta Singh Kumam, Lalengmawia Ralte, Liston Colaco, Ashique Kuruniyan & Brandon Fernandes.
Forward: Sunil Chhetri, Irfan Yadwad, Manvir Singh, Suhail Ahmad Bhat & Lallianzuala Chhangte.
