Shillong, Jymmang 09
Ar ngut ki samla rangbah kiba dei ki nongtrei mon sngewbha kata u samla Purningstar Shabong bad u samla Enlang Sawian, ha ka 6 tarik Jymmang, 2025, ki la leit ban buh da ka jingujor shapoh ka Meghalaya Human Rights Commission (MHRC) ban dawa pynshitom ïa ki briew kiba donkti ban khanglad ïa ki nongshong shnong ban ïoh jingbylla na ka skhim Mahatma Gandhi National Rural Employment Guarantee Act (MGNREGA) hapoh ka shnong Laitnongkseh kaba hap hapoh Sohïong Community & Rural Development (C&RD) Block mynta la kumba ar snem kynthih.
Na ka liang kine ki samla ki la pynpaw ba kane ka jingkhanglad ïa ki nongshong-shnong ka dei ka jingdonkti jong katto-katne ngut ki briew bad kumjuh na ka jingbym shimkhia u Block Development Officer (BDO) ka Sohïong C&RD Block, Dr. Clifford JK Warjri.
Haba kren sha ki lad pathai khubor, u samla Purningstar Shabong, u la ïathuh ba kane ka jingkhang ïa kane ka skhim hapoh ka shnong Laitnongkseh ka dei ba la leh da katto-katne ngut ki briew. Kane ka jingkhang ban pyntrei ïa kane ka skhim Job Card ka long kaba la ktah shikatdei eh ïa ki nongshong shnong khamtam ïa kiba duk, kiba kyrduh bad kiba im ban trei bylla na kane ka kam Job Card.
“Ka daw ka long ba ki don ki briew kiba shim kabu ban pynthut ïa ka rukom pyntrei Job Card bad sa kawei ruh ka dei na ka jingkheiñ sting palat jong u BDO haba ïadei bad kane ka kam”, ong u samla Purningstar.
U samla Purningstar u la ong ba watla na ka liang u Rangbah Shnong ryngkat bad ki nongkitkam shnong na ka por sha ka por ki la dep ban pynsngew halor kane hynrei na ka liang u BDO u khlem shimkhia satia halor kane ka bynta bad kaba la pynlong pat ïa ka ophis u BDO ba kan pynsangeh ïa ki jingpyntrei ïa kane ka skhim.
“Ka jingpynsangeh ïa ka jingtrei ka long shisha kaba ktah haduh katta-katta namar haba khang ïa ka jingbylla ka mut ka ktah ïa ka jingim jong ki bad kane ka jingkhang ïa ka jingbylla ka ktah ruh ïa ka hok longbriew-manbriew, halor kata ka nongrim ngi la wan ban ujor hangne hapoh ka Human Rights Commission da ka jingkyrmen ba na ka liang ka Commission kan leh ïa kaba donkam khnang ba kito kiba donkti ban pynwit, pynthut bad ban khang ïa kine ki jingtrei Job Card ba kin shah pynshitom ha ki kyndon aiñ”, ong u samla Purningstar. Shuh-shuh, u samla Purningstar u la ong ba kitei ki briew kiba donkti ban pynwit bad pynthut ïa ka jingtrei ki dei ïa uba la tip kyrteng kum u Philstar Nongbri bad u Devious Lyngdoh ha ryngkat ki katto-katne ngut kiwei pat bad ong ba ïa kine ki briew kiba donkti ban pynthut ïa ka kam ki dei kiba la shah pyndonkam da ki briew kiba don ha ka bor kum ha ka Hima Sohïong.
“Ki briew kiba don hapoh ka Hima Sohïong ki ju pyndonkam da kine ki briew tang na ka bynta ban pynthut ïa ka roi-ka par bad ban pynthut ïa ka jingïoh jingmyntoi hapoh ka shnong-ka thaw. Sa kawei pat ka bynta, ngi ïohi ba wat na ka liang ki nongtrei ka ophis jong ka Sohïong C&RD Block ruh, ki ju pyndik na ka por sha ka por ïa ki nongshong shnong”, ong u samla Purningstar.
Kumta, na ka liang une u samla u la kyrpad ïa ka Meghalaya Human Rights Commission ba kan shimkhia ban leh eiei katkum ki kyndon aiñ ïa kino-kino ki briew kiba pynthut ïa ka jingpyntrei ïa ka skhim MGNREGA.
