Narainpur, Chhattisgarh, Jymmang 09
Ka Meghalaya ka la ïoh ban rung sha ka semi-final jong ka lympung ïalehkai Swami Vivekananda U20 Men’s National Football Champion-ship 2025 hadien ba ka la pynliem noh ïa ka Karnataka da 1-0 kol ha madan Ramakrishna Mission Ashra-ma ha ka Sngi Thohdieng, 9 tarik Jymmang 2025.
Kane tnoit shi kol la thep da u nonglehkai shakhmat ka Meghalaya u Ricky Kharkongor ha ka minit kaba saw jong ka jingïalehkai. Ka Karnataka ka la pyrshang tyngeh ban wanphai biang bad thaw katto-katne ki kabu, khamtam ha ka kylla miet. Hynrei ki rangïalehkai shadien jong ka Meghalaya ki la ïengskhem bad khanglad ïa ki nongïalehkai jong ka kynhun pyrshah ha kano-kano ka bynta jong ka jingpyrshang.
Ka Meghalaya, kaba la rung sha ka quarter final ha ka rukom kaba itynnad bha, ka la jop baroh lai tylli ki jingïakhun ha ka Group A, ka la shem ba ka long kham tbit bha ïalade ha ka jingïakhun pyrshah ïa ka Karnataka hadien ba ka la lah thep kol kloi. Ka kol ba la pashat bol na ka liang kadiang kaba la hap ha ka phyllaw kol jong ka Karnataka la lah ban thep kol najan da ka jingtriem u Ricky Kharkongor wat la ki don ar ngut ki nonglehkai jong ka kynhun pyrshah sawdong jong u.
Hadien kata, ka Karnataka ka la ïakhun shitom ha ka jingïalehkai baroh kawei bad ka la jan ïoh ban thep kol ha ki katto-katne ki khep. Hynrei ka la long pat kaba eh ban ïoh pynïakhaid.
Te, lyngba kane ka jingjop ka Meghalaya kan ïakhun pyrshah ïa ki kynhun ba jop ha ka jingïakhun jong ka quarter final hapdeng ka Group C bad ka Group D ha ka semi final jong ki. Ki jingïakhun jong kane ka group kin sdang ha ka 11 tarik bad 12 tarik u Jymmang.
Ha ka 11 tarik Jymmang, Lah Sngi U Blei, 2025 ki jingïalehkai (Group C) ba la pynthikna ki long:
Ha ka por 07:30 mynstep, ka Ladakh kan ïakhun pyrshah ïa ka Sikkim bad ha ka por 4:15 janmiet ka Uttar Pradesh kan ïakhun pyrshah ïa ka Punjab.
