Jowai, Jymmang 09
Ka Meghalaya Commercial Truck Owners and Drivers Association (MCTODA) Jaiñtia Hills Unit haka 9 tarik Jymmang kala weng noh ia ka jingïakhih kaba khlem buh por hadien ba ka synjuk ki karkhana Coke ka la pan por 10 sngi ban pyrkhat halor ka jingdawa ka seng ban pynkiew ïa ka dor bai kit ïa u Coke naka T. 1400 shi ton sha ka T. 2500 shi ton.
Kane ka jingiakhih ka la sdang haka 6 tarik Jymmang ha surok bah Hynniew mer, West Jaintia Hills District da kaba sangeh kit coke na ki karkhana.
Haka 9 tarik Jymmang u Deputy Commissioner jong ka East Jaintia Hills District ha ryngkat ka jingdonlang ki SP jong ka East bad West Jaintia, ula khot jingialang iaki arliang mamla ka MCTODA bad synjuk ki karkhana Coke ha ophis treikam jong u ban ïakren pynbeit halor katei ka jingdawa.Haba ïakren bad u president ka MCTODA, u Bah Heibormi Pariat ula ïathuh ba ha ka jingïalang ka synjuk ki karkhana Coke ka la pan por 10 sngi ban shong pynkhat halor katei ka mat jingdawa bad ula ong ba lada katei ka jingdawa kam urlong hadien katei ka 10 sngi, ka seng kam banse ban ïaid shakhmat ban pynlong biang ka jingïakhih.
