Shillong, Jymmang 09
Da ka thong ban pynduh jait shi syndon ïa u drok na ka Jylla, khamtam ban ïada ïa ki khynnah na ka jingshah pynngop ha u drok, ka Sorkar Jylla kan sdang ban phah pyntbit ïa ki nonghikai ba kin long ki nongïasyllok ‘Counsellor’ ban pyllait ïa ki khynnah na u drok naduh ba ki dang rit.
U Myntri ka tnat Social Welfare, Bah Paul Lyngdoh u la ïathuh ba kumba 100 ngut ki nonghikai ki la pynkhreh ban ïoh jinghikai ba kin long ki ‘Counsellor’ hapoh ka 10 bnai.
U la ong ba ka Sorkar lyngba ka DREAM ka la shim ïa baroh ki sienjam ha ka jingpyrshang jong ka ban tehlakam bad pynduh jait ïa u drok bad ïa ka jingkynrei ka kam khaïi drok hapoh ka Jylla Meghalaya.
“Kawei na ki sienjam ba kongsan kaba ngi la shim mynta ka long ba ngin sdang da kaba pynbiang bad weng ïa kane ka jingma naduh ka rta ba dang lung kaba mut ba ngin ym shah, ngin pyrshang ban ym shah ïa ki samla lud jong ngi ba kin ngop ha ka jingdih drok,” u la ong.
U la ïathuh ruh ba ka Drug Reduction Elimination Action Mission (DREAM) dang shen ka la ïatreilang bad ka Sanker Centre for Neurology & Mental Health, ha kaba yn ai jingpyntbit ïa ki nonghikai ha Sanker kumno ban ïasyllok ïa ki khynnah pule naduh klas II haduh klas V, khnang ba ki khynnah kin sngewthuh ïa ka jingdonkam ban kiar na u drok. Ha kaba ïadei bad kane ka thong jong ka Sorkar, u Myntri u la ong ba ka Sorkar Jylla kan bei 50% ka jinglut-jingsep ban pyntbit ïa ki nonghikai kaba long T.10,000.
“Kane ka dei ka sienjam kaba khraw ba ka Sorkar ka la bei tyngka ïa ki nonghikai ban long kum ki nongïasyllok namar ba ngin ym lah ban lum lang shi jaka ïa ki khynnah skul,” u la ong.
Ha kajuh ka por u Bah Paul u la pyntip ba kawei na ki Klob Phutbol ba heh ka Jylla, ka Shillong Lajong FC ka la ïatreilang bad ka Sorkar ban ïalap pyrshah ïa ka jingñiew beiñ ïa kiba dih drok bad ban kren ban khana ïa ki samla ka Jylla. U la pyntip ruh ba ka Sorkar ka la phai khmat bha sha ka jingai jinghikai ha ka Vocational & Skill Development ïa samla kiba la ngop ha u drok. Na ka liang u Mission Director ka DREAM, Bah Francis Kharshiing u la ong ba la pynshlur ïa ki skul ba kin jied iwei na ki nonghikai ban phah sha kane ka jaka ban pyntbit ïa ki kum ki ‘Counsellor’.
“Ka course ka long tang 10 ngut ki nonghikai ha ka shibnai, bad kan sa nang kiew ha ki 10 bnai ba ngin sa ai jingpyntbit ïa kumba 100 ngut ki nonghikai. Ka jingthmu hi ka long ba ki nonghikai ba la pyntbit ki lah ban pynsngewthuh bha ïa ki khynnah,” la ong u Mission Director.
