Shillong, Jymmang 11
Ka Hynñiewtrep Youth Council (HYC) ha ka sngi Saitjaiñ ka la rai ban pynsdang biang ïa ka ‘Sierlapalang Operation’ pyrshah ïa ki mynder ri beaiñ kiba wan rung shapoh ka Jylla Meghalaya.
Haba kren sha ki lad pathai khubor hadien ka jingïalang CEC, u President ka HYC Bah Roykupar Synrem u la ong, “Ngi la rai ban pynsdang ïa ka ‘Sierlapalang Operation’ pyrshah ïa ki mynder ri kiba wan ban wad kam wad jam ha Jylla”.
“Kane ka jingkhynra kan long ban lap ïa ki mynder ri kiba sah ha Meghalaya khlem ki kot ki sla kiba biang, ka registration. Ka Meghalaya ka la dep pyntreikam ïa ka aiñ Meghalaya Identification, Registration, Safety and Security of Migrants Workers Act, 2020. Katkum kane ka aiñ, baroh ki nongtrei bar jylla ki hap ban register hapoh kane ka Act. Ngi kwah ban pynthikna ba baroh ki nongbylla bar jylla ki dei ban register bad lada shem ba ki khlem pat register bad ym bud ïa ki kyndon ka aiñ, ki dkhot jong ki kin leh ïa kaba donkam katkum ka aiñ,” u la bynrap.
U la ong ba ym don ba lah ban kyntait ïa ka jingshisha ba da ka jinglong jingman hapdeng ka India bad Pakistan, ki la don ki khubor halor ka jingwan rung tuh ki mynder ri hapoh ka Jylla. Katkum ka kaiphod na ki BSF, ki la ïoh ban bat ïa bun ngut ki nongrung beaiñ.
“Wat ki dkhot jong ngi na khappud ka Bangladesh, ki la ïoh bat ïa ki nongwan rung tuh bad ki la aiti ïa ki sha ki pulit. Lada ym lah ban tehlakam ïa ka jingwan rung tuh na Bangladesh, ka jingshngaiñ jong ka Jylla kan sa shah ktah bha bad kumjuh ruh ka ri baroh kawei,” u la ong.
“Namar kata, ngi la bthah ïa baroh ki unit bad ki dkhot kiba don ha ki thaiñ khappud ka Bangladesh ba kin peitngor bha bad lada ki ishankhmat ïa kino-kino ki briew, ki dei ban bat bad aiti sha ki pulit ba kin pynthikna bad leh ïa kaba donkam” u la ong.
