Tura, Jymmang 11
Ka kynhun jong ki seng bapher-bapher na ka thaiñ Selsella kaba hap hapoh West Garo Hills (WGH) ka la thoh sha u Divisional Forest Officer (DFO), Wildlife ban pan ïa ka kam ha ka tnad ‘Wildlife’ kaba neh hadien ba uwei u nongshong shnong ha Balalgre u la shah ïuh ha ki hati khlaw, kaba la ïalam sha ka jingmynsaw jur jong u.
Ha ka shithi sha u DFO, ki CSO ki la pyntip ba ha ka 8 tarik u Jymmang, uwei u nongshong shnong uba dang trei ha ka kper ‘Cashew’ lajong, ha ka por kumba 7 baje mynstep, u la shah thombor ha u hati khlaw.
Utei u briew u la mynsaw jur ha ki bynta jong ka kjat bad u dang don hapdeng ka jingshitom jur haduh mynta.
Kane ka jaka ka hap hapoh ka lynti ïaid jong ki hati kaba la bna nam bad la sakhi ruh ïa ka leit ka wan kaba man ka por jong ki hati lyngba katei ka thaiñ.
Kitei ki kynhun seng ki la pynkynmaw ruh ba naduh u snem 2023, ki la leit sha ophis ka tnad Wildlife ban pynsngew halor ka leit ka wan jong ki hati bad ki lad ki lynti ban ïada ïalade lyngba ka ‘Wildlife Post’ ha katei ka thaiñ. Hynrei ym shym la shim ïa ki sienjam kiba tikna ha kaba ïadei bad kane ka bynta.
Haba pynpaw ïa ka jingsngewsih halor kaei kaba la jia ar sngi mynshwa, ki kynhun seng ki la pynpaw ba ki la sngewsih ba ym shym la ai jingïarap eiei ïa utei u lanot da ka tnad watla kim shym la lah ban ïada ïa u.
“Ngi dawa jur ba dei ban buh ïa ki ‘Forest Guard’ ka tnad Wildlife kiba neh ha ka thaiñ Selsella – Balalgre ban peitngor ïa ka jingïaid jong ki hati bad ban pyntikna ïa ka jingïada ïa ki paidbah jong ka thaiñ. Ngi kyntu ruh ïa ka tnad ban sdang noh kloi haba ïadei bad ka jingsiew bai lutksan sha u lanot,” la pyntip kitei ki kynhun seng lyngba ka kyrwoh.
