New York, Jymmang:
Ka Nikki Haley, nongïalam jong ka seng Republican na India-America, ha ka Sngi Palei ka la ong ba ka India ka don “ka hok baroh” ban pynphai kylliang bad ban ïada ïalade hadien ka jingshah thombor ha ki lehnoh jong ka Pakistan ha Pahalgam, da kaba pynskhem ba ka Pakistan kam dei ban shu leh mynleh kum ka nongshah thombor namar dei ma ka hi kaba sdang ia katei ka jing-iakynad.
Ka India ka la leit hiar thma sha ktem lehnoh jong ka Pakistan hapoh ka ‘Operation Sindoor’ kum ka jingpynhiar kput halor ka jingleit thombor jong ki lehnoh ha Pahalgam ha Jammu and Kashmir, ha kaba 26 ngut ki riew paidbah ki la ïap ei ha kine artaiew ba la leit.
Hapoh katei ka jing-leit thombor, ka India, ka la ioh ban ther bom sha khyndai tylli ki ktem lehnoh kiba don ha Pakistan bad Kashmir, kaba hap hapoh ka jingsynshar jong ka Pakistan.
U myntri kam bar ri, u Vikram Misri u la ong ha ki nongthoh khubor ha New Delhi ba ki shipai India ki la pynlong ïa ka jinghiar thma kaba la buh jingkheiñ, kaba khlem pynjur, kaba ïahap, bad kaba don ka jingkitkhlieh ban pynpra ïa ki jingtei jong ki lehnoh ha Pakistan ban “pynsangeh bad ban khanglad lypa” ïa kino kino ki jinghiar thma jong ki lehnoh hadien- habud.
Haba kren ha ka jingïalang bad ki nongthoh khubor, u Misri u la ong ba la shim ba ka long kaba donkam eh ba ïa ki nongleh kam sniew bad ki nongthmu ïa katei ka kam thombor ha ka 22 tarik u Iaiong ba ki dei ban shah pynngat ha ka aiñ, namar ba ym shym la don kano- kano ka sienjam kaba lah ban pyni ba ka Pakistan ka shim khia ban tehlakam ia katei ka jingleit thombor jong ki lehnoh ha India, watla kitei ki lehnoh kiba thombor ia ka India ki dei kiba don hapoh u pud- u sam jong ka hi hynrei ym shim la iohi ba ka Pakistan kan shim khia ne leh eiei ia kitei ki lehnoh.
Ka Haley, ka dei ka Lat barim jong ka South Carolina bad ka la long kum ka nongrah ktien jong ka US sha ka United Nations, ha ka por ba u Donald Trump u dang long President nyng-kong jong ka US.
Ka Haley ka long ruh ka nong India ba nyng-kong eh kaba la shah thung ha ka kyrdan jong ka kynhun Myntri ha ka sorkar US.
Ha u snem 2023, ka la pynbna paidbah ba kan ïakhun ïa ka ilekshon President jong u snem 2024, hynrei ka la weng noh ïalade na ka jingïakhun ha u bnai Lber jong u snem ba la dep.
