Mawkyrwat, Jymmang 11
Ka Federation of Khasi Jaintia & Garo People (FKJGP) South West Khasi Hills District ha ryngkat ka jingsynran lang u Secretary shnong ka shnong Umjarain lem bad u President ka Seng Samla Shnong Diwah Area ha ka 10 tarik u Jymmang 2025 ka la khang tala noh shipor ïa ka Sub- Centre kaba don hapoh ka shnong Umjaraiñ ha South West Khasi Hills District.
Ka jingkhang tala noh ka seng ïa katei ka Health Sub-Centre ha Umjaraiñ ka dei hadien ka jingkut noh ka por kaba ka FKJGP SWKHD ka la aipor ar taïew ïa ka ophis u DMHO bad ka tnat ka koit ka khiah ba kin thung kam noh mardor ïa ka Kong Shidalin Lyngkhoi kaba dei trai ïa katei ka jaka kaba ki la ai sngewbha sha ka Sorkar ban tei ïa ka Health Sub-Centre naduh usnem 2010 ha ryngkat ka jingïateh soskular ban thung kam ïa ki trai jaka.
U Bah Enbor Syiemïong, Information Secretary ka FKJGP SWKHD haba kren sha ki lad pathai khubor u la ong ba ka seng na ka por sha ka por ka la leit ban ïakynduh ïa u DMHO bad ha ka 17 tarik u Ïaïong, 2025 ka la leit ban ïakynduh ïa u Deputy Commissioner jong ka SWKHD ba kin pynbeit noh kloi ïa katei ka kam ban thung kam pura noh ïa ki trai jaka hynrei haduh mynta na ka liang ka tnat ka koit ka khiah kam shym la patiaw ïa ka jingleit kynduh bad ai kot jingthoh jong ka seng bad u la ong ruh ba ka seng kam banse ban khang tala noh shipor ïa kane ka sub-centre tad haduh ba na ka liang ka tnat ka koit ka khiah kan da ïa pynbeit shwa bad ki trai jaka.
Shuh shuh na ka liang u Bah Coverland Lyngkhoi, Secretary shnong Umjarain u la kyrpad ïa ka Sorkar ba ka dei ban ïa pynbeit noh kloi ïa kane ka kam kumba ka la kular bad ïateh kular bad ki trai jaka khnang ba kan nym long ka jingduh jingmyntoi ïa ki paidbah jong kane ka dong ka thaiñ.
