Shillong, Jymmang 11
U MLA ka United Democratic Party (UDP) na Amalarem uba dei u Myntri barim jong ka tnat Pule-Puthi ka Jylla, Bah Lahkmen Rymbui u la khyrwit tyngeh ïa ka tnat Pule-Puthi ka Sorkar Pdeng halor ka jingbym lah ban pynbeit ïa ka kynrum kynram hapoh ka skulbah North Eastern Hill University (NEHU) haduh mynta.
“Nga kren shai ba ka Ministry ka khlem leh eiei haduh mynta. Ka shu ieh beit kumto bad ieh ba kane ka kynrum kynram kan ïaid beit. Kane ka dei shisha ka jingbym kitkhlieh nalor ba ka la pynbna ïa ka National Education Policy (NEP), ba baroh ki jaka pule khamtam ki skulbah ka Sorkar Pdeng ki dei ban ai ka jinghikai kaba bha, hynrei da kane ka rukom pynïaid, da kane ka rukom leh mynthi, phi tharia ba ka NEHU kan ai ka jinghikai kaba bha,” la ong u Myntri barim ka Jylla, ha kaba u la bynrap ruh ba um sngew ïahap ïa kane ka jingleh mynthi jong ka tnat Pule-Puthi ka Sorkar Pdeng.
“Ka dang lah ba slem ban ïa kaba ym leh eiei. Nga kyrpad ïa ka Ministry ba kan pyrkhat noh bad ngin ïapynbeit noh ïa ki kynrum kynram ha NEHU kloi katba lah na ka bynta ka jingbha bad ka bit ka biang jong ki samla pule,” u la ong.
Haba pynpaw ba ki samla pule kin ym poi shaduh une u pud lada ym don kano-kano ka jingeh ha NEHU, u la ong ba kumno ban pyllait ïa kita ki jingeh ka Ministry ka dei ban shim khia ïa kane.
“Ym don ki samla kiba kwah ban duh ïa ki jingpule tang na ka daw ban pynbha ïa ka NEHU. Ki leit ha NEHU ban pule ban ïoh ïa ka jingstad, tangba kaei kaba pynlong ïa ki ban ïaleh pyrshah ïa ki bor pynïaid ka NEHU, kata ka dei ka kamram jong ka Education Ministry ban tuklar,” la ong u Bah Rymbui.
Haba kynthoh halor ka Committee ba la thung da ka tnat Pule-Puthi ka Sorkar Pdeng, u Bah Rymbui u la ong, “Hooid, ka Ministry ka la thung ïa ka Committee ban pule bniah ïa ki jingeh ha NEHU, hynrei haduh mynta ngim pat ïoh jingtip ïa ka kaiphot jong ka committee. Lada ka jia kumne kan dei ka jingduh kaba khraw ïa ki samla pule ha NEHU.”
