Shillong, Jymmang 11
Ka Meghalaya ka la nangjan ban khur biang sa kawei ka takma ha ka 7th Khelo India Youth Games hadien ba ka kynhun ïalehkai phutbol ka la jam sha ka semi final bad kan pynkhreh ban ïaknieh rung sha ka final.
Kane ka kynhun hapoh ka jingïalam u Bah Jeffrey Warlarpih (coach) kan ïakhun semi final pyrshah ïa ka Jharkhand ha ka Lah Sngi U Blei ha ka por 4 baje janmiet, katba ka Odisha ïa ka Mizoram ha ka por 7:30 mynstep.
Lah ban kdew ba ka Meghalaya ka la ïoh rung sha ka semi final hadien ba ka la lah ban pynliem noh ïa ka West Bengal da 3-1 kol ha ka sngi Saitjaiñ ha Begusarai, Bihar.
Wat la ka West Bengal ka la pynkhih jar nyng-kong eh lyngba u Irfan (61), hynrei u Mebanlamlynti Masharing u la lah ban pynphai kylla haduh ar kol lyngba ka penalty ha ka minit kaba 78 bad kawei pat ha ka minit 87. Ha shwa ban wai ka Meghalaya ka la thep biang sa shi kol lyngba u Ïaishanbok Buhphang (90’+10) na ka bynta ban jop shi syndon. Ka West Bengal ka pynkut ïa kane ka jingïakhun da khyndai ngut ki rangïalehkai na ka daw ba ar ngut ki la shah sei red card ha ka kylla step.
Wat la ka Meghalaya ka la mad ïa ka jingshah rem ha ka jingïalehkai ba la dep ha ka Odisha da 2-1 kol, hynrei kane ka jingjop ka la pynlong ïa ka ban ïoh rung sha ka semi final na ka Group-A namar ar tylli ki kynhun kin ïoh rung na kawei-pa- kawei ka group.
Ka jingïoh rung ka Meghalaya ka dei lyngba ka jingïoh 6 point na ki lai sien ïakhun jong kane ka group. Katba kawei pat ka kynhun kaba la rung na kane ka group ka long ka Odisha kaba la jop ïa ka West Bengal bad Meghalaya.
Lah ban pynkynmaw kane ka kynhun ïalehkai phutbol ka Jylla ka la rah ïa ka nam lahduh mynshem snem bad takma rnong ha u snem 2023. Hynrei mynta u snem ka don jingkyrmen ban khur biang ïa ka takma ksiar bad kane kan shong ha ka jinglah ban ïalehkai bha bad ka donkam ban jop ha kane ka jingïakhun semi final.
