Washington, Jymmang:
Hapdeng ka jingïakynad jong ka India bad ka Pakistan, u President ka US Donald Trump u la ong ba lada u lah ban leh eiei ban iarap, u kloi ban ieng hapdeng jong kitei ki arliang mamla bad ban wanrah noh ia ka jingiasuk hapdeng jong ki khnang ban lah pynkut noh ia ka jingiakynad shi syndon.
Namar u Trump u la ong ba kane ka jinglong-jingman mynta ka long kaba shyrkhei haduh katta-katta, hynrei namar ba u ju iadei kam bad iatreilang bad baroh arliang ki ri, u tip bha ia baroh arliang bad u kwah ruh ban iohi ba kin ia pynbeit noh ia ki jingiakynad baroh. Kumta u kyrmen skhem ruh ba kitei ki arliang ri kin dang lah ban sangeh noh ia ka thma ha ka por kaba biang.
Haba la kylli pat ia u, hato u don kano-kano ka khubor na ka bynta kitei ki ri, u la ong, “Em, nga shu kyrmen ba katei ka thma kan kut noh shen.” Ka India ka la sdang ïa ka Operation Sindoor ha ka step jong ka Sngi Balang ha kaba ka la leit ther bom sha khyndai tylli ki ktem lehnoh ha Kashmir (PoK) bad ha Punjab, kiba hap hapoh ka jingsynshar jong ka Pakistan kum ka jingpynhiar kput halor ka jing-leit thombor jong ki lehnoh ha Pahalgam ha ka 22 tarik u Iaiong, kaba la shim ia ka jingim jong 26 ngut ki briew ha katei ka jingjia.
