Shillong, Jymmang 11
U Symbud Myntri Rang-bah ka Jylla, Bah Sniawbhalang Dhar, u la pynshai ba um pat ju ai pisa ïa ka Hynñiewtrep Natio-nal Liberation Council (HNLC) namar ka dei ka seng kaba la shah kheiñ be-aiñ ha ka Sorkar India hynrei kine baroh ki dei tang ki jingkynnoh ban pynthohbria ïa u.
Haba ïakren bad ki nonglum khubor ha jaka sah jong u ha Shillong ha ka Sngi U Blei, u Bah Sniawbhalang u la ong ba u la dei ban pynshai ha kine ki sngi hynrei namar u don shabar ka jylla kumta mynta ka sngi u la hap ban pynshai ïa kane ka jingkynnoh khnang ba ki paidbah ka jylla kin ïoh jingshai.
Halor ka jingdawa ki seng liang pyrshah ban hiar shuki na ka kam Symbud Myntri Rangbah halor kane ka jingkynnoh, u Bah Sniawbhalang u la ong ba ki liang pyrshah kin pyrshah beit hynrei ma u, un ym hiar shuki namar u khlem leh kano-kano kaba bakla namar un dang bteng ban long kum u Symbud Myntri Rangbah na ka bynta ban shakri ïa ki paidbah ka jylla Meghalaya.
U la ong haba ki kynnoh dei ban don ki sakhi kiba biang.
U la ong ba um don kano-kano ka jingpyrshah ïa ka seng HNLC ne ki seng saiñpyrthei hynrei shwa ba kin kynnoh ki dei ban don ki sakhi kiba biang.
Shuh shuh u la ong ba u hap ban wad jingtip ïoh don mano-mano na sha lyndet ban kynnoh khlem nongrim ïa u.
Kum ban shu pynkynmaw, ar tylli ki seng saiñpyrthei, kita ka VPP bad Congress ki la dawa ïa u Bah Sniawbhalang Dhar ba un hiar shuki noh hadien ka jingmih ka jingkynnoh ba u donkti ban ai pisa ïa ka HNLC khnang ba ka jingtohkit kan long kaba khuid.
