New Delhi, Jymmang 11 (UNI)
Ka ‘Operation Sindoor’, kaba la sdang ha ka 7 tarik Jymmang sha khyndai tylli ki ktem lehnoh ha Pakistan bad ha Jammu & Kashmir (ba la synshar da ka Pakistan-POJK), ka la ïalam sha ka jingïap jong palat 100 ngut ki lehnoh ba kynthup ïa u Yusuf Azhar, Abdul Malik Rauf bad u Mudassar Ahmad, ong u Director General of Military Operation (DGMO), Lt. Gen. Rajiv Ghai ha ka Sngi U Blei.
Haba kren sha ki nongthoh khubor ha ryngkat ka jingdonlang u DG Air Operations, Air Marshal, A.K. Bharti bad u DG Naval Operations, Vice Admiral, A. Pramod, u Lt. Gen. Ghai u la ong ba napdeng ki lehnoh kiba la shah pynïap, ki kynthup ïa kito kiba donkti ha ka jingrahbor ïa ka IC 814 ha u snem 1999 bad ki jingpynbthei bom ha Pulwama ha u snem 2019.
U la ong, “Ïa ka ‘Operation Sindoor’ la saiñdur da ka jingthmu (shipai) kaba shai ban pynshitom ïa ki nongleh kam sniew bad ki nongpynwandur ïa ki kam lehnoh kumjuh ban pynpra ïa ki jingtei lehnoh jong ki. Kaei kaba ngam pynpaw hangne shisha ka dei ka jingkut jingmut kaba ju pynpaw da ka India bad ka jingbym lah shah ne jingbym pdiang satia jong ka ïa ki kam lehnoh”.
U la ong ruh ba ki bor syntiat ki ïathuh ba ki khyndai tylli ki ktem lehnoh kiba don ha Punjab Pakistan bad POJK ki pyntikna ïa ka jingdon jong ki lehnoh. Ki jaka ba jur ki jingsniew ha Muridke, ki jaka pdeng jong ka LeT, ha ki snem kiba la leit noh, ki la pynheh-pynsan ïa ki snar lehnoh kum u Ajmal Kasab bad kiba kum u David Headley.
Ha ka miet jong ka 8 bad 9 tarik u Jymmang, u DGMO u la ong, “Ka Pakistan ka la pynher ïa ki ‘drone’ bad ki liengsuiñ sha ka jaka suiñ jong ngi ha kylleng ki jaka khappud bad ka la ïaid shakhmat bad ki jingpyrshang ba khlem seisoh la bunsien ban thombor ïa katto-katne ki jingtei shipai”.
U la ong ba la shim katto-katne ki sienjam ha ryngkew kum ka jingpyndonkam ïa ki tiar ïada suiñ bad ki tiar thma ‘electronic’ ban pynïasoh lang ïa ka ‘Grid’ bad ka tnad shipai suiñ ka India.
