Nongpoh, Jymmang 11
Kawei na ki skulbah ba la paw bha jong ka jylla Assam, ka Assam Don Bosco University (ADBU) ha ka sngi Saitjaiñ da ka jingsngew sarong kala pynlong ïa ka prokram kaba kyrpang ban pynkup burom ïa uwei na ki ‘riew proh jabieng bad u ‘riew shemphang ba pawnam ka jylla, u Prof. David R Syiemlieh ha ka jingïalang kaba la pynlong hapoh katei ka skulbah kaba don ha Sonapur.
Ha kane ka sngi, la wan ban ïadon ryngkat da u Fr. Jose Palely, Vice Chancellor ADBU, Fr. Bivan Mukhim, Vice Provincial lem bad kiwei kiwei de ki professor jong ka skulbah nalor kiwei kiwei de nonghikai na kiwei ki skulbah, ki khynnah pule lem bad ki bahaïing hasem jong u Prof. David R Syiemlieh.
Haba kren ha kane ka sngi, u Fr. Jose Palely u la pynpaw ïa ka jingsngewkmen kaba khraw ba kum ka skulbah kala ïoh ban pynkup burom ïa une u ‘riewstad, ‘riew proh jabieng ka jylla uba la ïoh ruh ïa ka khusnam Padma Shree na ka President jong ka ri India, ka Droupadi Murmu mynta u snem 2025 halor ki synñiang ki jong u ban kyntiew ïa ka thoh ka tar bad pule puthi.
U Fr. Jose Palely ha kane ka sngi, u la ïathuh khana lyngkot ruh halor ka jingïaid lynti jong u Prof. David R Syiemlieh bad pynpaw ba wat hadien ba une u ‘riew shemphang u la ïoh ban bat ïa bun ki kyrdan kiba heh bad wat ïa ka kyrdan Chairman jong ka Union Public Service Commission (UPSC), hynrei u dei u briew uba leh rit bad uba trei hok ïa la ka kam ban kyntiew ïa ka pule puthi bad ka thoh ka tar.
Na ka liang u Prof. David R Syiemlieh pat ha ka jingkren ka jong u, u la pynpaw ïa ka jingsngewnguh ïa ka skulbah ADBU kaba la kynmaw bad pynkup burom ïa u ha kane ka sngi bad ai khublei ruh ïa baroh kiba la ïadon bynta bad u ha kane ka jingïaid lynti ba kynthup naduh ka skulbah North Eastern Hills University (NEHU), ka Rajiv Gandhi University (RGU) bad kiwei kiwei de ki ‘riew stad ‘riew shemphang kiba la ïarap ban pynlong ïa u kumba u long mynta.
