Shillong, Jymmang 11
Ka Khasi Students’ Union (KSU) Delhi Unit ha ka janmiet jong ka sngi Saitjaiñ, 10 tarik u Jymmang 2025 ka la ïoh ban leit pyllait ïa kawei ka samla Khasi kaba dang 22 snem ka rta kaba dei na thaiñ East Jaiñtia Hills, kaba la shah set jubor ha ka ïingsah jong u samla jong ka ha Hasanpur, East Delhi kaba la mynsaw namar ba ka la shah shoh bad shah jrong kti ha utei u samla ha katei ka miet.
Ka KSU Delhi hapoh ka jingïalam jong ka samla Marbiang Khongwir kum ka President bad u samla Donbok Pohrmen kum Vice President haba ki la ïoh ïa ka jingujor, mar mar ki la mih ban leit wad jingïarap na ki bor pulit kiba don ha nongbah Delhi. Hadien ka jingshah kyntait na ki lai tylli ki thanat ban ïarap na ka daw jong ka jingbym lah ban lap ïa ka ïingsah jong u shynrang, kumta ka KSU Delhi ka la ïoh ki lad jingïarap lyngba ka thanat Madhuvihar ban wad ïa katei ka ïingsah lyngba ki kor technology bad la lap bad ïoh ban leit khynra ïa katei ka ïingsah ha ka por 5 baje mynstep jong ka 11 tarik Jymmang bad la ïoh ban ïarap ïa ka ‘thei samla bad la ïoh rah ruh ïa u shynrang ban tohkit da ki pulit ka thanat Maduvihar.
Hadien ba la dep ban shim jubab na katei ka samla Khasi, la ïalam ban leit leh medical checkup bad synran da ki dkhot bad ki pulit bad la pyllait noh ïa katei ka ‘thei samla hadien ba ka khlem treh ban ujor pyrshah ïa utei u samla jong ka uba na Hasanpur, East Delhi.
Na ka liang ka KSU, ka ai khublei ïa ki pulit ka Delhi bad ka SPUNER Special Police Unit kiba la ïarap ban leit wad ïa katei ka samla Khasi.
Ban tip kham bniah ïa katei ka jingjia, U Nongsaiñ Hima na Shillong u la ïoh ban ïakren lyngba ka phone bad ka samla Marbiang Khongwir kaba dei ka President ka KSU Delhi Unit.
Ka samla Marbiang ka la ïathuh ba kane ka samla Khasi ka dei kaba trei ha Delhi bad ka ïalang samla bad u briew uba na Delhi. Hynrei, namar u shoh u dat ka mut ban leit shim noh ki jaiñ na ïingsah jong une u samla. Kumta ka la ïalam lang ïa ka paralok hynrei ynda ka la poi sha ka ïingsah jong une u samla, ka la shah shoh, katba ka paralok jong ka pat ka la shah pynap tari bad ha kaba u la pynpait ruh ïa ka phone jong ka.
Ka la ïathuh ba kane ka paralok da ka jingtieng ka la phet noh bad mar shu poi sha ïing ka la pyntip noh sha ki nongïalam KSU Delhi Unit.
