New Delhi, Jymmang:
U Myntri Rangbahduh ka Jammu & Kashmir, Omar Abdullah ha ka Sngi Saitjaiñ u la ther tyngeh ia ka International Monetary Fund (IMF) kaba la mynjur ban ai ram haduh $1 Billion sha ka Pakistan wat ha kum kane ka por ba ka Pakistan ka dang don hapdeng ka jingiakynad kaba jur bad ka India.
Kumta utei u heh u la ong ba um lah shuh ban mutdur ha kano ka rukom ba ki heh jong ka IMF ki pyrkhat namar kane ka jing-ai ram ia ka Pakistan ha kum kane ka por ka long tang ban ai mynsiem ia kane ka ri ba kan nang pynjur ia ka jingiakynad bad ka India.
Namar ka IMF ha ka Sngi Thohdieng ka la pynbna ba ka ‘Executive Board’ ka la pynkut noh ia ka jingiakren bad ka Pakistan haba iadei bad ka jingthmu jong ka Pakistan ban pynkylla dur ia ka jing-long-jingman bad ka ioh- ka kot ha katei ka ri hapoh jong ka ‘Extended Fund Facility’ bad kumta ka IMF ka la rai ban ai ram ia ka Pakistan haduh kumba 1 Billion USD.
Katei ka sienjam ba la shim da ka IMF ha kane ka kynti ka long ruh ha kum kane ka por ba ki shipai Pakistan ki dang phah ia ki drone bad ki ‘namding jongki sha ki nongbah jong ka thaiñ Sepngi jong ka India bad sha ki ktem shipai ka India bad da kane, ka jingai ram jong ka IMF sha ka Pakistan kynthup ia kaba la dep ai ha ki por ba la leit, ka la kot ia ka 2.1 billion USD.
Ka IMF ka la iathuh ba ka la kyrpad ia ka ram EFF ban pyndep hapoh 37 bnai bad ia kane la dep ai jingmynjur naduh u Nailur jong u snem 2024 ba la leit. Ka jingthmu jong kane ka ram ka long ban ai jingkyrshan ia ka Pakistan ba kan pynbit- pynbiang bad kan kyntiew ialade ha ki liang bapher.
Namar la ong ba ka RSF kan ai jingkyrshan ia ka jingpyrshang jong ka Pakistan ban pynduna ia ka jingma na ki jingshah pynjulor ha ki bor ka mariang bad ban pynbit- pynbiang ban thaw lad kumno ban ïakhun ia ki jingeh kiba wan mih namar ka jingkylla ka suiñbneng.
