Shillong, Jymmang 11
U Myntri Rangbah ka Jylla, Conrad K. Sangma u la kyrpad ïa ka jingtuklar jong u Myntri ka tnad Pule-Puthi ka Sorkar Pdeng, u Dharmendra Pradhan ban pynbeit thymmai ïa ki jaka thoh eksamin CUET-UG na bynta ki samla pule ka Meghalaya hapoh ka Jylla lajong.
“Nga kyrpad jur ïa ka jingtuklar jong phi ban bthah ïa ka National Testing Agency (NTA) ba kan khmih bniah bad pynbeit thymmai ïa ki jaka thoh eksamin CUET (UG) 2025 na ka bynta ki kyrtong Meghalaya hapoh ka Jylla,” ong u Sangma ha ka shithi ba la phah sha u Pradhan.
U la kyrpad ruh ïa u Myntri ban pyrkhat ha ka ban pynkynriah ne pynjlan ïa ka eksamin na bynta ki samla pule ka Jylla mynta u snem tad haduh ban da pyntikna ba ki jingbit-jingbiang ki la dep lut nadong-shadong.
“Kane ka jingkyrpad ka mih na ka jingsngew halor ka jingdonkam kyrkieh jong ki samla jong ngi, bad nga shaniah ba ka ophis jong phi kan pyrkhat bha halor kane kumba dei hok ban ïoh,” u la ong.
Haba pynpaw ka jingsngewkhia halor ka mat ba ïadei bad ka jingpynïaid ïa ka eksamin CUET (UG) 2025, u la ong ba ka jingbym biang ha ka jingdon ki jaka thoh eksamin hapoh ka Jylla ka la wanrah ka jingkhuslai jingmut hapdeng ki samla pule bad ki kmie ki kpa ha kylleng ka Jylla.
“Bun ngut ki samla pule kiba la jied ïa ki jaka thoh eksamin hapoh ka Jylla Meghalaya – khamtam ha Shillong – ki la shah pynngat sha ki jaka kiba jngai kum sha Jorhat, Dibrugarh, Mizoram, Nagaland, bad wat ha Kolkata. Kane ha kawei ka liang ka la ban khia shi kat dei ïa kiba bun ngut ki samla pule, khamtam kito kiba na ki longïing kiba duna ka ïoh ka kot, kiba mynta ki hap ban pynlut shuh sa na ka bynta ka leit ka wan bad ka jaka sah. Ha kiba bun ki khep, kine ki jinglut ki long palat ïa ka bor jong ki,” ong u Sangma.
U la ong ruh ba kane ka jingeh kaba la mih ym tang ba ka la pynthut ïa ka jingpynkhreh jong ki samla ïa ka jingpule jong ki, hynrei ka ïalam ruh sha ka jingtieng ïoh don katto-katne kiba lah ban shah pynbor ban iehnoh syndon ïa ka eksamin.
“Kane ka jinglong-jingman ka la mih wat hapdeng ka jingkyrpad bad jingkular ha ki por ba la dep ha kaba ïadei bad ka jingdon jong ki jaka thoh eksamin kiba biang hapoh ka Jylla. Ka long kaba kongsan ban tip ba ka Sorkar Meghalaya ka la ai ka jingkyrshan kaba pura ïa ka NTA da kaba pynithuh ïa ki jaka kiba lah ban pynlong ïa ka eksamin bad ban tyrwa ïa baroh ki jingïatreilang ha ka liang ka jingpynïaid kam,” la ong u Myntri Rangbah.
Shuh shuh haba bynrap ba ka Jylla ka la thaw ïa ka State-Level Committee, ryngkat ki District-Level Committee, ban pynsuk ïa ka jingïaid beit ïaid ryntih jong ki eksamin ka NTA hapoh ka Jylla, u la ong, “Wat hapdeng kine ki jingpyrshang, ka jingpynbeit ïa ki jaka thoh eksamin ha kane ka kynti ka ïai long ka daw kaba buh jingeh.”
