Khliehriat, Jymmang 11
Ka jingtwa khyndew ka la jia ha ka janmiet jong ka Sngi U Blei ha Dona Skur harud surok National Highway 06, kaba la pynlong ïa ka jingïaid jong ki kali baroh ban sahkut lut.
Ki pulit ki la ïathuh ba ka surok ka la shah khang ha ki thliew kiba heh bad ki la ai jingmut ïa ki nongleit nongwan ba kin shim da kiwei pat ki lynti tad haduh ban da dep pynkhuid ïa katei ka bynta jong ka surok.
Ha kane ka jingjia twa khyndew, ym shym la don kano- kano ka jingmynsaw ne jingjulor, hynrei ka jingpynthut ka la ktah ïa ka leit ka wan jong ki kali ha kawei na ki surok bah kaba kongsan tam kaba pynïasoh ïa ka Meghalaya bad ka thaiñ shatei lam-mihngi jong ka Assam bad kiwei kiwei ki jylla jong ka thaiñ shatei lam-mihngi jong ka Ri India.
Kane ka surok ka dei ka bynta jong ka surok NH-06, kaba dang ïai bteng ban ïakynduh ïa ka jingtwa khyndew kaba ju jia man ka por, khamtam ha ka por jong ka jingsdang ban hap u slap.
