Mawkyrwat, Jymmang 12
Ka Nonglang Sports Club ka la pynbna ba kan pynlong noh ïa ka jingïalehkai phainal jong ka Golden Jubilee Celebration Football Tournament 2024-25 ha ka 23 tarik mynta u bnai ha madan Pyndenïew-lyngdoh, Nonglang, South West Khasi Hills District.
Ki kynhun ki ban ïaknieh ïa ka nam lahduh ki long ka Evergreen Football Team na Nongjri pyrshah ïa ka Ryntihlang Football Club na Jakrem ha ka por 1 baje nohphai sngi.
Ka lahduh ha kane ka lympung kan ïoh T.1.30 lak bad kaba wan ba-ar kan ïoh T. 70 hajar ryngkat ki trophy nalor ki khusnam shimet ba la pynkhreh ïa ki nongïalehkai ba kynsai.
Na ka liang ka Nonglang SC ka la pyntip ruh ba ha katei ka jinglehkai phainal kan don ruh ka jingpynkhalai nusip ïa ki Lucky Draw, kumta ka la wer ïa ki paidbah ‘riew ïeit phutbol ba kin wan sakhi ha katei ka sngi.
