Shillong, Jymmang 12
Ka shlem treikam Deputy Commissioner, East Khasi Hills District ka la pynlong ïa ka rally arshaka kum ka dak ban burom bad ai khublei ïa ki shipai ka ri bad ban pynpaw ïa ka jingïatylli bad ki shipai kiba don ha khappud.
Ïa kane ka jingïaid rally la lam khmat da ka Deputy Commissioner, Kong R.M Kurbah bad ka thong ka long ban sngewnguh ïa ka jinglen-lade bad ka jingïakhun kaba khlaiñ jong ki shipai ka India.
Ka rally ka la sdang na Golflink bad la plie paidbah da u Bah Shanborlang Warjri, Additional Deputy Commissioner, bad la pynkut ha U Soso Tham Auditorium.
Ha ka jingïalang kaba lyngkot ha Soso Tham Auditorium, ka Kong Kurbah ka la ong ba kane ka jingïaid rally ka dei ka dak ban ai burom ïa ki shipai kiba don ha ka jingïakhun pyrshah ïa ka Pakistan.
Ka la pynkynmaw ruh ïa ka jingshah thombor ha Pahalgam kum ka nuksa kaba pyni ïa ka jingkhlaiñ mynsiem bad ka jingtrei shitom jong ki shipai.
“Ngi ïeng ryngkat bad ka jingïaroh. Ngi ïoh thiah suk tang namar ki shipai ki ïaid miet ban sumar ïa ka jingsuk jong ngi,” ka la ong.
Ka la pynpaw ruh ïa ka jingkyrshan kaba pura jong ka Sorkar ïa ki shipai, ha kino-kino ki jaka ba ki don.
“Wat la ki don ha ki jaka ba jngai, ki shipai kim long marwei. Ngi ki paidbah ka India ngi ïeng ryngkat lang bad ki,” ka la bynrap.
Ka Kong Kurbah ka la pynkut da ka jingkyrmen ba ka jingïakhun kan poi sha ka jingshong suk bad ka jingjop jong ka ri.
