Shillong, Jymmang 12
Ka National People Women Front (NPWF) jong ka Meghalaya State Unit, kum shi bynta ban kynmaw burom ïa la ki jong ki kmie kiba la pun la kha bad pynheh pynsan, ha ka 10 tarik mynta u bnai, ka la pynlong ïa ka jingrakhe ïa ka sngi ba kyrpang jong ki longkmie ne ka Mother’s Day.
Ïa kane ka jingrakhe ka NPWF la pynlong ha ki lai tylli ki block jong ka ri lum Khasi Jaiñtia.
Kane ka jingrakhe ka dei ban long ha ka 11 tarik mynta u bnai, hynrei namar ba ka dei ka Sngi U Blei, kumta la rakhe noh ha ka 10 tarik, kaba dei ka sngi Saitjaiñ.
Ki Block kiba la rakhe ïa ka sngi kyrpang ki kmie ki kynthup ha Nongpoh kaba don ïa ka Kong Rona Khymdeit kum ka MDC jong ka NPP, ha Pynursla Block ba don ka Kong Grace Mary Kharpuri ka MDC jong ka Nongshken bad ha Jowai Block ba don ïa ka Kong Violet Lyngdoh kaba dei ka MDC shimet hynrei kaba la rung bad pynïasoh noh ïalade sha ka NPP.
Haba phai sha ka jingrakhe ïa ka sngi ba kyrpang ki kmie ha Nongpoh kaba la pynlong ha Parish Hall Nongpoh, u MLA ka Mawhati, Bah Charles Marngar u la shim ïa ka bynta kum u kongsan ha ka jingdon lang ryngkat ka Kong Jasmine Lyngdoh kaba dei ka President jong ka NPWF State Meghalaya Unit, ka MDC ka thaiñ ka Kong Rona Khymdeit bad kiwei de ki nongkitkam ka seng.
Ha kane ka sngi, kum shi bynta ban ai burom ïa ki longkmie kiba trei ha ki bynta bapher bapher kiba kyntiew ïa ka imlang ka sahlang ki la shah pynkup burom ha ka NPWF kiba la don ym duna ïa ka shispah ngut.
Ha ka jingrakhe ha Jowai Block la pynlong ha Shnong Dorbar, Lion Mission Compound, ha kaba u MLA ka Jowai, Bah Wailadmiki Shylla u la shim ïa ka bynta kum u kongsan ha ka jingdon lang bad kiwei ki nongkitkam ka seng nalor kiwei pat ki longkmie kiba la shah pynkup burom ha ka NPWF.
Haba phai sha ka jingrakhe ha Pynursla kaba la pynlong ha Dorbar Hall jong ka shnong Pynursla, ka MDC jong ka Nongshken ka Kong Grace Mary Kharpuri ka la long ka kongsan ha ka jingdon lang ryngkat u Bah Rahbok Tynsong bad kiwei de ki nongkitkam jong ka seng bad ha kane kajuh ka sngi la pynkup burom ruh ïa palat spah ngut ki longkmie.
Na ka liang jong ka National People Women Front, Meghalaya State Unit ha shwa ban pynkup burom ïa kine ki longkmie, ki da jied ban peit bniah bha ïa ki longkmie kiba trei ha ki bynta bapher bapher kiba long shisha ki jingnoh synñiang sha ka imlang ka sahlang bad khamtam eh kiba ïarap ruh ïa ki para longkmie bad kumjuh ïa kito ki longkmie kiba ïeng ha la ki jong ki kjat.
