New Delhi, Jymmang 12 (UNI)
Hadien ar sngi ba la pynbna ïa ka jingïateh soskular ban sangeh ïasiat bad ka Pakistan, u Myntri Rangbahduh ka ri, Narendra Modi, ha ka miet Lah Sngi U Blei, u la ong ba ïa ka ‘Operation Sindoor’ la shu sospon bad lada ka Islamabad ka ïaid shakhmat bad kino-kino ki kam ban ai ding ne pynshit, ka jubab kan long kaba jur bad tyngeh bad yn ym pdiang shuh ïa kata ka “Nuclear Blackmail”.
Ha ka jingkren sha ka ri lyngba ka telebishon, kaba long ka jingkren paidbah kaba nyngkong eh jong u hadien ba la sdang ïa ka ‘Operation Sindoor’ ha ka 7 tarik u Jymmang, u Modi u la ong ba ka ‘Operation Sindoor’ ka la ïalam sha ka jingshah pynïap jong palat 100 ngut ki lehnoh bad kyntait ïa kano-kano ka jingïakren bad ka Pakistan ne ban pyrkhat biang halor ka jingsospon ïa ka ‘Indus Waters Treaty’ tad haduh ba ka Islamabad ka pynkut noh ban kyrshan ïa ki kam lehnoh.
U la ong ba ka India ka la mynjur ïa ka jingsangeh ïasiat hadien ba ka la pynjulor ïa ki jingtei lehnoh ha Pakistan – kaba la kyrpad ïa ka pyrthei na bynta ka jingshngaiñ bad “la kular sha ngi ba kan ym don bynta shuh ha kano-kano ka kam lehnoh ne ka jingleh bakla jong ki shipai”.
Haba pynbna ba ka “‘Operation Sindoor’ mynta ka dei ka polisi jong ka India pyrshah ïa ki kam lehnoh”, u la ong, “Ngi la pynsangeh tang ïa ki kam pynshitom beiñ jong ngi pyrshah ïa ki lehnoh bad ki jaka shipai jong ka Pakistan. Ha ki sngi ban wan, ngin sa khmih bniah ïa ki jingleh jong ka Pakistan.”
Da kaba pynskhem ba ka jingshah thombor ha Pahalgam ka dei ka jingshah thombor jong ka mynsiem ka India naba bun ki kynthei ki la duh noh ïa la ki kurim, u Modi u la ong hadien ki jingshah thombor na shiliang-sha-shiliang khappud ha u snem 2016 bad ki jingshah thombor ha Balakot ha u snem 2019, ka ‘Operation Sindoor’ ka dei ka “policy bathymmai” jong ka India pyrshah ïa ki kam lehnoh bad baroh ki shipai ïada ri ka India ki ïai bteng ban long kiba husiar.
“Ka nongrim jong ka India ka la long kaba shai. Ki kam pyntriem, ka khaïi-pateng bad ka jingïakren kim lah ban ïaid ryngkat…. Ka khaïi-pateng bad ka jingïakren kim lah ban ïa ïaid lang bad kumjuh, ka snam bad ka um kim lah ban ïa tuid lang,” u la pynskhem.
U la bynrap ba ka India ka lah ban ïakren bad ka Pakistan tang halor “ki kam lehnoh bad ka Jammu & Kashmir (POJK) – ba la synshar da ka Pakistan”.
Haba kdew ïa u apostol jong ka jingsuk, u Gautam Buddha ha ka lyngkhuh dap snem jong u mynta ka sngi, u Modi u la ong, “U Buddha u la pyni ïa ngi ïa ka lynti jong ka jingsuk. Hynrei ka lynti jong ka jingsuk ka ïaid ruh lyngba ka bor.”
U la ong, “Kane tikna kam dei ka juk jong ka thma, hynrei kam dei ruh ka juk jong ki kam lehnoh. Ka jingbym pdiang satia ïa ki kam lehnoh ka dei ka jingkular ïa ka pyrthei kaba kham bha.”
Haba maham ïa ka Pakistan, u la ong ba lada ka kwah ban “lait im”, kan hap ban pynpra ïa ki jingtei jong ki kam lehnoh bad ban sangeh noh ban kyrshan ïa ki.
U Myntri Rangbahduh u la ong ruh ba ka India kam pynïapher shuh hapdeng ki lehnoh bad ka Pakistan State – haba pyrkhat ïa ka rukom ba ki heh ophisar shipai ka Pakistan ki leit shim bynta ha ka jingleit ontep ïa ki lehnoh kiba la shah pynïap na ki jingthombor ka India.
“Ym don shuh ka jingpynshisha kaba kham khraw halor ka jingkyrshan kam lehnoh da ka Jylla… Ka pyrthei baroh kawei ka la ïohi ïa ka jingshisha kaba jakhlia jong ka Pakistan haba ki ophisar ba ha khlieh duh jong ka, ka kynhun shipai ki la leit ïashim bynta ha ka jingleit ontep ïa ki lehnoh ba la shah pynïap.”
Haba kren shaphang ka ‘Operation Sindoor’ kaba long ban kput kylliang ïa ka jingshah thombor ha Pahalgam, u Myntri Rangbahduh u la ong ba ka India ka la thmu ïa ki ktem jong ki lehnoh bad palat 100 ngut ki la ïap ha ka jingshah thombor na suiñ ha ka 7 tarik u Jymmang.
Ka Pakistan ka la “sheptieng” namar ka jingleh ka India hynrei ha ka jaka ban leh pyrshah ïa ki lehnoh, ka la sdang ban hiar thma ïa ki skul, ki kolej bad ki jaka shipai jong ka India, la ong u Modi.
Kane ka la wanrah ïa ka jingjubab kaba jur na ka liang ka India bad hapoh lai sngi, ki jingtei shipai ka Pakistan, ryngkat bad ki jingtei jong ki lehnoh, ki la shah pynjot haduh katta-katta, u la ong.
Da kaba peit ïa ka jingshah pynjot kaba nang jur bad kaba “la shah pynrem lut”, ka Pakistan ka la leit kylleng ka pyrthei ban wad jingïarap ïalade.
“Ha kum kane ka jingkut lad, ki shipai ka Pakistan ki la kynjoh ïa u DGMO jong ngi ha ka 10 tarik u Jymmang. Ha kata ka por, ngi la pynjulor shi kat dei ïa ki kam lehnoh ka Pakistan bad ki jingtei shipai, kiba la lyngkhot-lyngkhai lut. Kumta, haba ka Pakistan ka la kyrpad bad la pyntikna ïa ngi ba kan ym pynleit jingmut shuh ha ki kam lehnoh, ngi la pyrkhat halor katei ka jingkyrpad jong ki (ban sangeh ïasiat),” la ong u Modi.
Hynrei u la bteng ban maham, “Kano-kano ka jingshah thombor na ki lehnoh ha ri India kan ïoh ïa ka jubab kaba biang tam katkum ki kyndon jong ngi…Yn ym pdiang shuh ïa ka ‘Nuclear Blackmail’.”
U la ong ba lada ka Pakistan ka kwah ban lait im, ka dei ban pynpra noh ïa ki jingtei jong ki lehnoh bad sangeh noh shi syndon ban kyrshan ïa ki kam lehnoh.
