Jowai, Jymmang 12
Ka Mowkaïaw CYC ka la jop da 36 run pyrshah ïa ka Moodymmai SC ha ka lympung ïalehkai District Cricket League 2025 ba la pynïaid da ka West Jaiñtia Hills District Cricket Association ha ka Lah Sngi U Blei.
Ïa kane ka jingïalehkai la pynduna sha 10 over na ka 20 over namar ka jingpynthut u slap naduh ka por step. Te kumta ka Mowkaïaw CYC ka la kam trai ban tied nyngkong ha kaba ka la ïoh 88 run ha ki 10 over bad shah pynhap 5 wiket. U Sanvert B Kurkalang u la tied 33 run na ki 23 bol ryngkat 5 tylli ki ‘four’ bad u Ardakirang Rymbai (not out) u la ïoh 29 run na ki 13 bol ryngkat kawei ka ‘six’ bad saw tylli ki ‘four’. Katba u Pyndap Lamin u la shim 2 wiket ha kio 2 over na ka bynta ka Moodymmai.
Haba wan shimti ïa ka pali kaba ar, ka Moodymmai SC ka la tied tang 52 run ha ki 10 over bad duh noh 2 wiket. U kapten ka kynhun u Levestar Phawa (not out) u la tied 24 run na ki 31 bol ryngkat 2 tylli ki ‘six’. Katba u Kitboklang Lyngdoh bad u Sandabiang Lathong ki la shim mar 1 wiket na ka bynta ka Mowkaïaw. Ïa ka nam Man of the Match la khur da u Sanvert B Kurkalang.
Da kane ka jingjop, ka Mowkaïaw ka la wan ba ar ha ka miej kheiñ poiñ jong ka Pool-B da ka ba jop saw sien bad ïakhaid mar shisien na baroh 6 tylli ki jingïakhun bad ïoh 9 poin. Katba ka Moodymmai pat ka khlem lah ban jop wat tang shisien ruh bad ka ïakhaid ar sien na ki 6 tylli ki jingialehkai bad ka la wan ba khadduh ha ka Pool-B.
